Lionel Messi më në fund fitoi një trofe ndërkombëtar me Argjentinën, këtë verë, duke fituar Kupën e Amerikës. Kjo ndodhi pasi Albiceleste mposhti Brazilin në finale 1-0. Gjashtë herë fituesi i “Topit të Artë” ka reflektuar mbi mënyrën se si u shikua vetë dhe shokët e tij të skuadrës para se ta fitonin këtë trofe.

34-vjeçari kishte qenë më parë nënkampion i “Copa America” në tri raste, duke humbur në finalet 2007, 2015 dhe 2016, ndërsa ishte gjithashtu pjesë e Argjentinës që humbi në Kupën e Botës 2014, po në finale.

"Sot që kemi fituar Kupën e Amerikës është bukur. Ne gjithmonë mendojmë se jemi më të mirët, por nuk është kështu, – tha Messi gjatë një interviste për ESPN. – Ne nuk ishim më të këqijtë për humbjen e finaleve, as më të mirët për fitimin e Kupës së Amerikës. Gjëja e rëndësishme është të japim gjithçka në fushë.

Nëse nuk mund të fitonim, nuk mund të fitonim. Vetëm një skuadër fiton në një ndeshje futbolli. Arritja në finale nuk është gjë e vogël, por kjo meritë nuk na u njoh. Në fakt, ishte krejt e kundërta”.

Messi diskutoi perceptimin e Argjentinës që shihej si humbëse për dështimin në disa finale, të Kupës së Botës dhe Kupës së Amerikës: "Më parë na trajtuan si të dështuar, por nuk është e lehtë të fitosh një Kupë Bote. 15 ditët e para, mbasi largohesha pas një turneu me Argjentinën, isha shumë i hidhëruar, nuk doja të bëja asgjë. Pas fitores së finales me Brazilin shijova pushimet më të mira në karrierë".

Për Messin, shumica e atyre pikëpamjeve erdhën nga mediat: "Kishte një pjesë të gazetarëve që na trajtuan si dështakë. Ata na akuzuan se nuk e donim fanellën, na kërkuan që të mos luanim më për ekipin kombëtar, por ne u përpoqëm të jepnim më të mirën. Ne ishim të parët që donim të ishim kampionë, por jo gjithçka ka të bëjë me fitoren dhe humbjen në futboll”.