Një vit pas lamtumirës së tij, Thiago Silva ende nuk e ka asimiluar largimin e tij nga PSG. Qendërmbrojtësi i ka dhënë një intervistë ESPN-së, në të cilën ka kritikuar nënshkrimin e Sergio Ramos nga ekipi parizien, duke pretenduar se lojtarit spanjoll iu ofrua një kontratë 2-vjeçare në të njëjtën moshë sa ai vetëm një vit më parë.

"Unë mendoj shumë, shumë për gjithçka që ndodhi. Nuk kam asgjë kundër Sergio Ramos, të kuptohemi. Sidoqoftë, Sergio, kur i ofruan një kontratë 2-vjeçare, ishte në të njëjtën moshë me mua vitin e kaluar (kur nënshkroi me Chelsea). Nuk e kuptoj. Me të vërtetë, e gjitha kjo më trishtoi”.

Përveç kësaj, ai donte të shpjegonte se si u largua nga PSG: "Unë ende nuk kam folur me askënd për Ramos, por kjo më ka trishtuar. Duke mos marrë asgjë, është sikur të mos kisha bërë asgjë për klubin. Tifozët besonin se unë doja të vazhdoja të fitoja të njëjtën shumë parash. Nuk ka të bëjë me Chelsea. Paga ime…, marr më pak se gjysmën".

Së fundi, ai sulmoi drejtpërdrejt PSG për mënyrën sesi u konceptua largimi i tij: "Më vjen keq që nuk treguan më shumë ndjeshmëri për lamtumirën. Diçka mund të ishte bërë. Nuk ishin tetë ditë ose tetë muaj, por tetë vite fitore dhe punë”.

Sezonin e kaluar, Leonardo nuk donte t’ia rinovonte kontratën Thiago Silva, edhe pse ishte një lojtar kyç për PSG, që arriti në finalen e Ligës së Kampionëve në Lisbonë. Qendërmbrojtësi nënshkroi për Chelsea ditë më vonë dhe arriti të fitojë kompeticionin më të lartë kontinental së bashku me Tuchel, i cili gjithashtu u shkarkua nga Leonardo në janar.