"Askush nuk mund ta përballojë Cristiano Ronaldon". Ish-shefi ekzekutiv i Bayern Munich, Karl-Heinz Rummenigge, nuk ka dyshime për këtë. Kur u intervistua nga BILD, ai dukej se ka ide të qarta për të ardhmen e kampionit portugez:

“Problemi më i madh është se kush mund ta paguajë ende pagën e tij. Fitimet 70 milionë euro bruto, nga këto 35 milionë neto. Kush mund t’i përballojë këto shifra? PSG? Ndoshta ndonjë klub anglez?

Është një mënyrë jo shumë e shëndetshme për të përparuar futbolli, UEFA duhet të bëjë diçka. Ne kemi nevojë për rregullim të saktë, sepse kostot po rriten përsëri dhe një ndërhyrje është e nevojshme, ose futbolli do të duhet të përballet me një moment shumë, shumë të vështirë".

Qëndrimi i CR7 te Juve, pavarësisht sigurisë që dha të dielën Nedved, duket larg nga e dukshmja. Sipas “AS”, ai mund të shkojë te PSG nëse Mbappe “i ka bërë gati valixhet” për te Real Madridi.

Ndërkohë, të dielën, Cristiano Ronaldo e filloi nga stoli debutimin zyrtar të Juventusit në sezonin e ri të Serie A, kundër Udineses. Pasi hyri në lojë minutën e 60-të në vend të Morata, ai arriti të shënojë në minutën e pestë të kohës shtesë, por VAR-i ia ngriu në buzë lumturinë, sepse e anuloi golin për shkak të një milimetri pozicion jashtë loje.

A do të mbetet portugezi te Juve apo jo? Kjo është enigma e madhe për t’u deshifruar në këto ditë të fundit të merkatos së verës në futboll.