Pak para debutimit në Serie A, i takonte Beppe Marotta të fliste për merkaton e Interit, midis shitjes së Lukakut, rinovimit të Lautaro Martinez dhe blerjes së një sulmuesi tjetër.

Drejtori i përgjithshëm zikaltër, i intervistuar nga ‘DAZN’, përsërit sesi ishte Lukaku, ai që kërkoi të largohej nga Interi dhe të kthehej te Chelsea: "Përballë një vendimi kaq të qartë të një lojtari për t’u larguar, nuk ka asnjë klub që mund të rezistojë. Shitja e tij më pas u bë një mundësi për të siguruar menaxhimin financiar të këtij sezoni".

E kundërta është e vërtetë për Lautaro Martinez, i cili, pavarësisht ofertave, ka vendosur të qëndrojë te zikaltrit: "Ai është pjesë e asaj kategorie lojtarësh, të cilët në mënyrë eksplicite donte të qëndronte pavarësisht se kishte oferta. Lautaro tha prerë: Unë jam i Interit, ne jemi krenarë, kam një dëshirë për t’u përmirësuar këtu".

Në fakt, merkatoja në hyrje për Interin nuk përfundoi me nënshkrimet e Dzeko dhe Dumfries, duke qenë se klubi po kërkon goditjen e fundit:

"Ne po kërkojmë një sulmues tjetër, në përputhje me atë që ofron tregu dhe me disponueshmërinë ekonomike që kemi. Jemi të sigurt se do të bëjmë zgjedhjen më të mirë".