Turqia nuk ndodhet në ditët e saj më të mira këtë periudhë. Pas flakëve të zjarrit, autoriteteve u duhet të ndeshen me stuhinë që është shkaktare e humbjeve të shumta materiale dhe njerëzore.

Ministri i shëndetësisë, Fahrettin Koca, njoftoi në Twitter të Premten se 32 njerëz vdiqën në provincën Kastamonu, përgjatë Detit të Zi, dhe gjashtë në zonën fqinje të Sinopit. Numri u raportua gjithashtu nga agjencia qeveritare e fatkeqësive AFAD.

Bilanci i fatkeqësisë mund të jetë më i lartë pasi një  numër personash rezultojnë të zhdukur.

Politikani opozitar Hasan Baltac  tha për Halk TV, se banorët kishin kontaktuar autoritetet duke kërkuar informacion rreth 329 personave që ende dyshohen të zhdukur.

Presidenti, Rexhep Tajip Erdogan, vizitoi një nga qytetet më të goditura të Premten. Ai mori pjesë në një funeral për viktimat e para dhe kreu një lutje para qindra banorëve në qytetin e përmbytur të Kastamonu.

"Ne do të bëjmë gjithçka që mundemi si shtet sa më shpejt që të jetë e mundur dhe do të ngrihemi nga hiri," i tha turmës Erdogan, i cili anuloi festimet që shënonin 20 vjetorin e partisë së tij në pushtet. "Ne nuk mund t’i kthejmë qytetarët që kemi humbur, por shteti ynë ka mjetet dhe fuqinë për të kompensuar ata që humbën të dashurit e tyre."

Erdoan ka premtuar se do të rindërtojë shtëpitë e shkatërruara, rrugët dhe urat. "Ashtu si shumë pjesë të botës, vendi ynë po lufton me fatkeqësitë natyrore për një kohë. Është e njëjta gjë në Amerikë, Kanada, Gjermani dhe pjesë të tjera të Evropës", tha ai.