I intervistuar nga "Sportweek", ish-heroi i tripletës së Interit, Diego Milito, foli për kthimin e Mourinhos në Itali dhe lamtumirën e Contes nga klubi zikaltër:

Serie A rifillon nga Mourinho, me të cilin ju keni fituar gjithçka. A mund të fitojë sërish te Roma? Jose është një trajner i përshtatshëm për një vend si Italia. Ne e kemi parë këtë nga entuziazmi me të cilin u mirëprit kur erdhi në Romë. Ai është një trajner që i lartëson skuadrat. Eksperienca në kryeqytet është gjithashtu e veçantë për të. Nuk kam dyshim se edhe te Roma do të shkojë shumë mirë.

A nuk ekziston rreziku që kaq shumë pritshmëri të përfundojnë duke djegur Mou dhe Romën? Atij i pëlqejnë këto sfida. Roma e tij do të jetë e ashpër, e vështirë për t’u përballuar për këdo, lëre më të mposhtet .

Trofeu i tij i fundit është "Europa League" që fitoi në vitin 2017. Që atëherë, dy shkarkime te Manchester United dhe Tottenham. Pse tifozët e Romës duhet të besojnë se ai është ende "Special One"? Tifozët e Romës e njohin mirë Jose. Fitorja nuk është e lehtë, por e përsëris: Roma e Mourinhos do të jetë me imazhin e trajnerit të saj. Mourinho kthehet në Itali për të provuar se është ende i veçantë. Dhe do të ketë sukses.

Kritikët argumentojnë se Mou është mbi të gjitha një motivues sesa një strateg i shkëlqyer. A është kjo e vërtetë? Mbi të gjitha, një trajner duhet të ketë forcën dhe dijen se si të menaxhojë grupin dhe, në fakt, të marrë më të mirën nga të gjithë. Mourinho e ka këtë forcë. Kjo është arsyeja që e bën atë një trajner special. Ai e kupton psikologjinë, momentet e lojtarit dhe e di kur të të përqafojë dhe kur të të qortojë. Në çdo moment e kupton gjendjen tuaj mendore dhe di si t’ju motivojë. Të gjitha këto janë për të mirën e ekipit.

A është më mirë për të që të ketë lojtarë të rinj në formë apo preferon të gatshmit dhe të testuarit? Ai përshtatet me atë që ka. Ideali është që të ketë gjithmonë lojtarë me përvojë dhe të rinj të uritur. Kur mbërrita unë tek Interi, gjeta një ekip të moshës së mesme të avancuar, lojtarët ishin mësuar të fitonin. Mou ishte në gjendje t’i motivonte përsëri.

Trajneri portugez ka vendosur të rifillojë nga Dzeko… Mou ka pasur gjithmonë sulmues të mëdhenj, të cilët kanë shënuar shumë me të. Dzeko ka përvojë dhe e njeh mjedisin. Ai do të ketë një sezon të mrekullueshëm.

Duke folur për motivuesit, Interi ka humbur një fenomen si Conte… Me lamtumirën e Contes, Interi humbet vazhdimësinë e një projekti fitues. Antonio kishte kthyer mentalitetin e të qenit në krye, pas dy vitesh lojtarët i njihnin metodat dhe karakterin e tij. Tani fillon nga e para, ndaj ekziston rreziku për të humbur diçka në fillim, por më pëlqente Lazio e Inzaghit dhe mendoj se trajneri i ri u zgjodh sepse ai luan futboll të ngjashëm me atë të Contes; aplikon 3-5-2 me shumë driblime.