Pas golit kundër Nice, në debutimin e tij kuqezi (vetëm katër minuta pas hyrjes në fushë), është koha e prezantimit para mediave e nënshkrimit të ri të Milanit, Olivier Giroud.

Kampioni i Botës me Francën më 2018 dhe kampioni aktual europian me Chelsea, pas suksesit në Ligën e Kampionëve, iu prezantohet tifozëve të tij të rinj me peshën e një fanelle të rëndë mbi supe: numri 9, që pas lamtumirës së Inzaghit, nuk është përfaqësuar denjësisht te kuqezinjtë nga ata që e kanë veshur për “gjahtarit të golit”.

"Kur isha djalë i ri admiroja Arsenalin dhe Milanin. Jam i nderuar që munda të luaj në të dyja klubet. Kam parë Papin dhe Shevchenko, ne jemi miq dhe kam folur shpesh me to për të vendosur të ardhmen time. Është një nder për të luajtur këtu.

Unë sjell buzëqeshje në stërvitje, ka qenë gjithmonë stili im. Pa sakrificë nuk ka fitore, kjo është motoja ime. Dua të jem një lojtar i madh, por edhe një njeri i madh. Mundohem të jem sa më profesional të jetë e mundur”.

Për dualizmin e mundshëm me Ibrahimovic, Giroud është i qartë: "Është një mundësi e shkëlqyeshme për të luajtur me Ibrahimovic. Trajneri Pioli e zgjedh formacionin, jo unë. Jam këtu për të sjellë përvojën time, i sigurt që mund të plotësojmë njëri-tjetrin. Ibra ka një personalitet të madh, kam pasur mundësi për të folur me të në stërvitje.

Unë erdha këtu me shumë përulësi, për të punuar maksimalisht. Mendoj se të dy mund t’i sjellim më të mirën Milanit. Mund të luajmë së bashku, nëse trajneri dëshiron. Milani nuk është vetëm Ibrahimovic dhe Giroud, ka shumë lojtarë të tjerë të mëdhenj këtu".

Lidhur me synimet e tij në klubin kuqezi: "Dua të fitoj trofe me Milanin. Golat e mi? Do të jap më të mirën për ekipin dhe shpresoj të shënoj sa më shumë. Nuk e konsideroj veten si një alternativë, Pioli do të vendosë. Kur arrij në një ekip llogaris të luaj sa më shumë ndeshje të jetë e mundur.

Nuk jam i shqetësuar për veten, mendoj për ekipin. Gjithmonë përballeni me urrejtësit tuaj në karrierë, dëgjon shumë gjëra kur arrin nivele mjaft të larta. Nuk dua ta krahasoj veten me Messin dhe Ronaldon, por gjëra të këqija thuhen shpesh edhe për ata".

Mbi mbërritjen e mundshme tek Interi: “Mendoj se njeriu bën gjënë e duhur, fati im ishte të luaja për Milanin, edhe pse Interi më bëri ofertë. Te Chelsea, aventura ime kishte përfunduar, trajneri po mendonte për sulmuesit e tjerë, kështu që ishte koha për t’u larguar".

Lidhur me “mallkimin” e fanellës kuqezi me numrin 9: "Nuk jam paragjykues. Jam i krishterë dhe besoj se mund ta përballoj presionin e kësaj fanelle, që e kanë veshur Inzaghi, Van Basten, Papin. Do të bëj çmos për t’i bërë tifozët krenarë”.