Buffon te Parma, një zgjedhje zemre, por edhe për t’i dhënë një mesazh të mirë gjithë botës së futbollit. Duke folur për transferimin e portierit veteran italian, agjenti i tij historik, Silvano Martina, zbuloi objektivin ambicioz të 43-vjeçarit: Botërori i Katarit, që do të zhvillohet vitin tjetër.

"Ideja për të shkuar te Parma lindi rreth dy javë më parë. Duke marrë parasysh moshën e tij, unë kam pasur shumë kërkesa, po flasim për 6-7 ekipe. Përveç tri ofertave braziliane, hipoteza që na kënaqën, por që nuk mund të merreshin parasysh prej familjes. Para se të firmoste për Parmën më telefonuan nga Crvena Zvezda. Duke u kthyer nga Roma shkova ta takoja dhe Gigi më tha se te Parma kishte ndjerë emocione të forta. Pra, ky ishte ekipi ku donte të shkonte. Më mbajti një fjalim romantik, me kujtime…

Mesazhi që ai dërgon është i bukur: futbolli është pasion dhe dashuri, jo vetëm biznes. Biznesi është pasojë, por ju luani për tri pikët dhe kënaqësinë e stërvitjes. Ai po kthehet në një vend që e njeh. Menjëherë pasi fitoi Kupën e Botës 2006, Buffon shkoi për të luajtur kundër Riminit, në Serie B. Edhe asokohe, gjysma e Europës e donte atë. A ëndërron Kupën e Botës në Katar? Mendoj se është e qartë kjo ëndërr, ky objektiv. Në moshën e tij nuk duhet t’i vendosni vetes qëllime, por pa një objektiv nuk ka kuptim ta vazhdoni futbollin".