Partia Demokratike çel fushatën te sheshi "Nënë Tereza", mbështetësit edhe në makina te bulevardi "Dëshmorët e Kombit"

Partia Demokratike ka mbledhur përkrahës të saj në sheshin "Nënë Tereza" dhe te bulevardi "Dëshmorët e Kombit".

Ashtu si Joe Biden në mitingjet e tij nëntorin e kaluar në SHBA, mbushte hapësirat me mbnështetës që qëndronin në automjete, kështu po vepron edhe partia më e madhe e opozitës.

Në sheshin "Nënë Tereza" ishte vendosur podiumi kryesor ku folën drejtuesit demokratë dhe kryetari Lulzim Basha mbajti fjalimin kryesor.

Përgjatë gjithë bulevardit "Dëshmorët e Kombit" ishin stacionuar qindra automjete me përkrahës demokratë nga Tirana dhe rrethet e tjera të vendit.

Mitingu ishte planifikuar të niste në orën 16.30 por më tej u njoftua shtyrja për në orën 17. Mitingu nisi pak para orës 18.00.

Flutura Açka hapi tubimin e çeljes së fushatës: "Nuk mbahem dot, nis më merret goja kur flas për gjëra të dashura dhe një nga gjërat e dashura është fakti që jam këtu sot", tha ajo dhe shtoi: "Mjekë, inxhinierë, profesionistë ikën sepse nuk kishin mundësi", tha ajo duke theksuar se "do t’ia dalim t’i kthejmë, vetëm duke ndrequr demokracinë. Ose të ndreqim demokracinë tonë, ose të shkojmë në diktaturë. Të fillojmë ta ndreqim që sonte demokracinë", apeloi Açka.

Zëdhënësja e fushatës së PD, Floriana Garo që mori më tej fjalën, tha: "Pasi disa herë takova Lulzim Bashën, e kisha te qarte se ai është udhëheqësi që i duhet Shqipërisë. I vendosur, karizmatik, me përvojë. Dhe në të njëjtën kohë edhe një njeri i dashur dhe i afërt me njerëzit. Një person që ju flet njerëzve në sy, me të njëjtën gjuhë. Një person i cili është i përkushtuar ndaj Shqipësrise tone te bukur dhe është i gatshёm pёr tё sjellё ndryshimin qe mezi e presim te gjithë. Muajt e fundit e kam parë duke punuar deri në orët e vona të natës. Ai është konsultuar me shumë ekspertë për të sjellë më shumë plane pune, te detajuara dhe që do të përmirësojnë jetën e të gjithë neve në Shqipëri. Unë e kam parë Lulzim Bashen të zhvillojë bashkёbisedime dhe takime mbi çёshtje politikash me udhëheqësit evropianë. Unë pashë se si ata e vёshtruan atë – me admirim dhe me miqësi të thellë. Dhe mbi të gjitha – pashë Lulzim Bashёn qё takohet çdo ditë me qytetarët e Shqipërisë. Nga këto takime mësova ta vlerësoj edhe më shumë. Qytetarët shqiptarë kanë nevojë për ndryshim. Vendi ynë ka nevojë për ndryshim. I vetmi person që mund ta sjellë këtë ndryshim. I vetmi person që mund të formojë një qeveri që do të punojë për qytetarët në vend të një qeverie që punon vetëm për veten e saj. Ai është Lulzim Basha", tha Garo.

Në vijim e mori fjalën z.Basha i cili u thirr në podium nga Floriana Garo. Basha tha se kanë mbetur vetëm 31 ditë për të nisur bashkë rrugën e ndryshimit të Shqipërisë Kurse shtoi: "Jam mes jush sepse keni marrë një vendim. Keni marrë vendim t’i japim fund tranzicionit. Që më të mirët të drejtojnë vendin, sepse Shqipëria, sot më shumë nevojë se kurrë për ndryshim".

Fjala e kryetarit të PD, Lulzim Basha

"Mirëmbrëma Shqipëri! Përshëndetje ju motra dhe vëllezër që keni mbushur këtë shesh. Ju motra dhe vëllezër shqiptar kudo që ndodheni në këtë mbrëmje hyjnore të bashkimit tonë për ndryshim me të cilin do të fitojë Shqipëria dhe çdo shqiptar. Mirëmbrëma kandidatëve të Partisë Demokratike të Shqipërisë, aleatëve tanë të koalicioni, ekipit tonë të fitores dhe ndryshimit për çdo shqiptar. Edhe 31 ditë. Vetëm 31 ditë për të nisur së bashku rrugën e ndryshimit të Shqipërisë, rrugën e zhvillimit, të punësimit, të mirëqenies dhe të integrimit të saj në familjen tonë europiane. Jemi këtu të gjithë bashkë dhe jam mes jush sepse ju keni marrë një vendim shumë të rëndësishëm ti japim së bashku fund tranzicionit shqiptar dhe të hapim një faqe të re të historisë moderne dhe europiane të Shqipërisë. Të mundësojmë që më të mirët, më të ndershmit të drejtojnë fatet e vendit sepse familja jonë e madhe Shqipëria ka nevojë sot më shumë se kurrë për punë, nder dhe ndryshim rrënjësorë. Sepse ne sot më shumë se kurrë duhet të mbrojmë e të vendosim në vendin e duhur krenarinë tonë të kahershme kombëtare si shqiptarë, sepse duhet të ndalojmë një orë e më parë këtë varfërim dhe këtë zbrazje që po i ndodh so Shqipërisë, sepse nënat dhe motrat tona nuk duhet të kursen më nga dhimbja që shkakton braktisja e vatrave të familjes, që si pasojë sjell braktisjen e madhe që ka pllakosur sot mbarë vendin, sepse Shqipëria gjithmonë ka qenë kryelartë në shekujt e trazuar të historisë së vet. Dhe ne jemi sot këtu si përgjigje e thirrjes së saj për të ndalur dorën që zhvat pasuritë e kombit, dorën që vret shpresën e shqiptarëve dhe mendjen e errët që kërkon të mbjellë frikën dhe dyshimin në zemrat e bashkatdhetarëve tanë.

U bënë më shumë se një vit që filluam këtë marshim, këtë rrugëtim për të ndryshuar vendin tonë. Është një rrugëtim i vështirë por të cilin ne e kryejmë me përgjegjësi dhe me një gëzim të brendshëm sepse ne jemi të vetëdijshëm se puna jonë është një përkushtim dhe sakrificë për vendin, për shqiptarët, për Shqipërinë, për kombin sepse po shkulim dhe çrrënjosim nga damarët e tokës tonë një kast, një grusht, një të keqe që ka vendosur të shterojë dhe të përvetësojë për interesat e veta të gjitha pasuritë dhe burimet që Zoti kaq bujarisht ia ka falur Shqipërisë. Dhe po luftojmë kundër një grushti njerëzish që janë gati të bëjnë gjithçka vetëm për të mbajtur karriget e tyre por në të vërtetë ata nuk na qeverisin por ju shërbejnë vetes dhe ortakëve të tyre që po rrëmbejnë përmes akteve grabitqare gjithçka që ky vend ka, pasuritë tuaj, pasuritë e kombit. Por vëllezër dhe motra ne po zhvillojmë edhe një betejë tjetër, një betejë brenda vetes. Unë e di se pas 8 vitesh zhgënjime, mashtrime shumëkujt i ka humbur besimi e shumëkush mendon se ky vend nuk ndryshon. Për të gjithë ata që kështu mendojnë unë kam një pyetje për ju. A është kjo ajo që ne meritojmë? A janë varfëria dhe kostoja e jetës që rritet çdo ditë e më shumë ajo që ne meritojmë? A është mungesa e vendeve të punës, papunësia dhe mjerimi ajo që meritojmë? A është largimi nga sytë këmbët i rinisë, i këtij populli të talentuar, ajo që meritojmë? A është ky fati i shkruar për secilin prej nesh? Jo, nuk ka gënjeshtër më të madhe se kjo. Ky vend meriton më shumë, shqiptarët meritojnë më shumë dhe prandaj ne jemi sot këtu para jush që tua bëjmë të qartë të gjithëve, ne shqiptarët meritojmë më shumë dhe mundemi të bëjmë më shumë dhe do të bëjmë më shumë.

Miqtë e mi, të rinj dhe të reja studentë dhe studente, lulja e kombit tonë, energjia shpirti dhe forca e këtij vendi, bij dhe bija të Shqipërisë mbushini zemrat me shpresë, bashkohuni me ne për të ndryshuar këtë vend dhe për ta bërë atë si gjithë Europa. Rini shqiptare, çdo gjë e mirë që i ka ndodhur këtij vendi, gjithçka që ka ndryshuar për mirë në këtë vend mban vulën tuaj, ka fytyrën tuaj. Ndaj edhe kësaj herë vendi ka nevojë ju, ndryshimi kërkon mbështetjen tuaj që e keni derdhur në këtë shesh e anembanë Shqipërisë. Për 8 vitet e fundit Shqipëria i është larguar Bashkimit Europian për faj të qeverisjes dhe kryeministrit në ikje. Shëndetësia jonë tregtia jonë, arsimi ynë, shëndetësia, gjithçka vazhdojnë të jenë në krizë, të preken, të varfërohen thellësisht nga fakti që Shqipëria është larg pranimit në Bashkimin Europian. Jetët tona do të jenë shumë më të mira në çdo drejtim ku Shqipëria të plotësojë ëndrrën e saj dhe të bëhet pjesë e Bashkimit europian dhe unë e di se si arrihet kjo. E mbani mend si thonin ishte e pamundur që Shqipëria të hynte në NATO por ne caktuam një pikësynim, punuam fort dhe ia dolëm, sot Shqipëria është falë nesh anëtare e NATO-s. Mbani mend si të gjithë thonin se nuk mund të arrihej marrëveshja për lëvizjen e lirë pa viza, se ishte e pamundur, se s’kishte asnjë shpresë që shqiptarët të lëviznin të lirë, pa viza, me pashaportat e tyre. Por ne caktuam një pikë synim . Ne punuam fort dhe ia dolëm. Sot vij para jush për të shpallur një tjetër synim, një detyrë, një mision që i përgjigjet dëshirës së çdo shqiptari ndaj të cilit dhe ndaj të cilës angazhohem: Kur të më zgjidhni kryeministër detyra e parë madhore, misioni im hyjnor, misioni ynë hyjnor është futja e Shqipërisë në Bashkimin Europian. Që Shqipëria të jetë e fortë, e përparuar, e mirë për të gjithë, na duhet urgjentisht t’i lëmë pas 8 vite ngecje, 8 vite hapa prapa, 8 vite larg Europës dhe të nisim marshimin tonë të pandalshëm deri në anëtarësimin e plotë të kombit të shqipeve, në familjen tonë europiane! Vëllezër dhe motra, qytetarë dhe qytetare për të arritur këtë çlirim dhe këtë ndryshim, për të arritur këtë aspiratë që sapo ju fola ne, ky ekip që shihni sot dhe unë kam nevojë për ndihmën tuaj sepse pa ju ëndrrat më të bukura, planet më serioze shndërrohen në përralla dhe në pluhur. Pa ju, pa ndihmën e mbështetjen tuaj qëllimet tona për ndryshimin e madh që na pret mbeten thjeshtë ide dhe jo një udhëzues drejt një jete më të mirë. Në javët e ardhme le të qëndrojmë bashkë sa më afër, të bisedojmë dit për dit me njeri tjetrin, të bindim këdo që është në kërkim të shpresës se po punoj për një qëllim të lartë, se po punojmë për një qëllim fisnik, po punojmë për të garantuar një ndryshim të thellë, të vërtet e të pakthyeshëm për bijtë e shqipes. E që ky ndryshim të bëhet realitet secili nga ne duhet ti bashkohet kësaj përpjekjet. Bashkë për ndryshim Shqipëria fiton. Sepse nuk mund tua fsheh forca e vërtetë e ndryshimit jeni vetëm ju. Unë jam këtu në mesin tuaj si lajmëtarë, si një udhërrëfyes për të marrë rrugën dhe shtegun e duhur. Kam pra nevojë për ju, për ndihmën tuaj, për forcën tuaj ndaj ju kërkoj sot të më bashkoheni në përpjekjet e fundit e fundit të këtij rrugëtimi për t’i sjellë ndryshim Shqipërisë. Unë besoj tek ju, unë jam krenar për ju bashkëqytetarët e mi dhe ndjehem i nderuar për misionin e lartë që më keni besuar. E di që së bashku dhe vetëm së bashku ne do të kapërcejmë çdo pengesë dhe do të përmbushim çdo ëndërr. Dashuria për fëmijët, për familjet, për njeri-tjetrin, dashuria për Shqipërinë është forca që na mbush zemrat dhe na ushqen mendjen. Dhe dua që këtë dashuri të mos e përflasë në erë, por t’jua dëshmoj duke u shërbyer drejt rrugës së ndryshimit. Ndryshimi që ka filluar që ka zbritur sonte në këtë shesh siç ka zbritur në mendjet dhe zemrat e shqiptarëve kudo ku janë. Bashkë për ndryshimin, bashkë për Shqipërinë i sigurt që së bashku do të fitojmë, Shqipëria do të fitojë. Ju faleminderit shumë! Zoti e bekoftë Shqipërinë!"

“Jam i pandalshëm…” himni i fushatës së PD

Kënga e fushatës së PD siç ndiqni live më poshtë, do të jetë “Unstoppable” (I pandalshëm) nga këngëtarja e njohur ndërkombëtarisht Sia.

Nuk dihet nëse kjo këngë ka qenë zgjedhje e kryedemokratit Lulzim Basha apo e dikujt tjetër nga selia blu, por teksti tregon forcën për të mos u dorëzuar në asnjë sfidë.

“Jam i pandalshëm.

Unë jam një Porsche pa frena.

Jam i pathyeshëm.

Po, unë fitoj çdo lojë të vetme.

Unë jam aq i fuqishëm.

Nuk kam nevojë për bateri për të luajtur.

Jam kaq i sigurt.

Po, sot jam i pandalshëm”, – thuhet në refrenin e këngës, duke lënë të kuptohet fare qartë synimin që Partia Demokratike ka.