Droni me flamurin e Shqipërisë Etnike që fluturoi mbi qiellin e Beogradin mbrëmjen e 14 tetorit 2014 provokoi incidente të shumta, aq sa çoi edhe në pezullimin e ndeshjes kualifikuese Euro 2016, mes Serbisë dhe Shqipërisë.

Pavarësisht mungesës së tifozëve në stadium, në një ndeshje tjetër serbo-shqiptare, Tirana i druhet një situate të ngjashme.

Anash stadiumit ku do të luhet ndeshja ka shumë pallate të larta dhe madje Tirana ka marrë informacion se mund të lëshohet një dron i dytë, me përmbajtje të ngjashme, në ndeshjen e së martës në mbrëmje, mes Tiranës dhe ekipit serb Crvena Zvezda., e vlefshme për kualifikueset e Champions.

Për këtë arsye mësohet se Tirana ka njoftuar Policinë e Shtetit duke iu frikësuar ndonjë ndodhie të papritur gjatë sfidës së nesërme me Crvena Zvezdën.

Kjo pasi, në rast se ndodh një gjë e tillë, penalizohet Tirana si organizatore e ndeshjes nga UEFA.

Klubi bardheblu ka marrë informacione se disa persona mund të shpalosin një mesazh politik me dron kundër Serbisë gjatë sfidës së nesërme.

UEFA alon kategorikisht shpërndarjen e mesazheve të urrejtjes me natyrë politike apo raciste.

Nisur nga këto të dhëna, 25-herë kampionët e Shqipërisë i kanë bërë thirrje Policisë së Shtetit të marrë masat e nevojshme për parandalimin e çdo të papriture.

Crvena Zvezda ka mbërritur nën masa të forta sigurie sot në Tiranë dhe është sistemuar në një hotel të kryeqytetit, në pritje të ndeshjes me kampionët e Shqipërisë.

Policia e Tiranës, sakaq, mori masa të shtuara për mbarëvajtjen e rendit dhe sigurisë gjatë zhvillimit të ndeshjes së futbollit midis ekipeve Tirana – Crvena Zvezda (Beogradit), e vlefshme për kualifikimin për pjesmarrje në Ligën e Kampionëve, që do zhvillohet më 25 gusht 2020, në orën 20:00, në stadiumin “Air Albania".

Masat e policisë:

Ndeshja Tirana – Crvena Zvezda (Beogradit) do të zhvillohet pa tifozeri, si masë parandaluese për përhapjen e infeksionit COVID-19.

Nga Drejtoria Vendore e Policisë Tiranë do të meren sërish një serë masash teknike dhe organizative në një zonë më të gjerë se perimetri i stadiumit, me qëllim sigurimin e rendit dhe të sigurisë publike para, gjatë dhe pas zhvillimit të ndeshjes së futbollit, duke synuar jo vetëm mbarëvajtjen e aktivitetit sportiv, por dhe moslejimin e grumbullimit të tifozëve, si masë parandaluese për përhapjen e infeksionit COVID-19.

Në kuadër të këtyre masave të parashikuara informojmë qytetarët e Tiranës se:

Do të lejohen të futen në stadium vetëm ata persona të caktuar nga ekipi dhe FSHF, sipas protokollit sanitar “Për organizmin e ndeshjeve të futbollit”. Nëse do të konstatohen shkelje të protokollit do të ndërhyjë dhe do të vendosen masa administrative sipas aktit normativ ndaj të gjithë personave përgjegjes.

Nuk do lejohen grumbullime të tifozëve në sheshe apo në ambientet përreth. Në rast grumbullimi Policia do të ndërhyjë për shpërndarjen e tyre.

Gjithashtu do të ketë bllokime të disa segmenteve rrugore, në të cilat nuk do lejohen të lëvizin as mjetet dhe as këmbësorët.

Segmentet rrugore që do të jenë të bllokuara, nga ora 18:00 deri në përfundim të aktivitetit, janë:

Rruga përreth stadiumit “Lek Dukagjini”, rruga “Dervish Hima”, rruga “Gjergj Filipi”, rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”, nga presidenca, sheshi “Nënë Tereza” deri te sheshi “Shopen”, si dhe sheshi para Universitetit Politeknik.

Policia e Tiranës kërkon mirëkuptimin e qytetarëve për të evituar lëvizjen me automjete si edhe levizjen me këmbë në segmentet rrugore të lartpërmendura në oraret e caktuara.

Policia e Tiranës apelon edhe njëherë për respektim me rigorozitet të protokolleve të sigurisë, me qëllim parandalimin e përhapjes së COVID-19.

/NOA.al