Ambasada e Shteteve të Bashkuara të Amerikës jep informacion zyrtar lidhur me takimet që ka zhvilluar ambasadorja Yuri Kim, me krerët e politikës duke zbuluar se çfarë u diskutua me ta.

Zbardhja e takimeve vjen një ditë para se parlamenti të mblidhet për të votuar ndryshimet kushtetuese të cilat parashikojnë hapjen e listave në zgjedhje dhe mos lejimin e koalicioneve para zgjedhore.

Bëhet me dije se gjatë javëve të fundit, ambasadorja Kim ka pasur biseda të shumta mbi reformën zgjedhore me Presidentin Ilir Meta, Kryeministrin Edi Rama, lryetarin e Partisë Demokratike Lulzim Basha, anëtarë të Këshillit Politik mbi Reformën Zgjedhore, si dhe me një sërë ekspertësh e të tjerë.

Deklarohet se Kim ka nënvizuar tri pika: Së pari, marrëveshja e 5 qershorit, e cila u arrit nëpërmjet një procesi transparent dhe gjithëpërfshirës, duhet respektuar ashtu si u ra dakord për të.

-Së dyti, Parlamenti ka kompetencat dhe përgjegjësinë për të marrë në shqyrtim dhe miratuar legjislacionin.

-Së treti, në të njëjtën kohë, edhe pse ata të cilët “dogjën mandatet e tyre”, bazuar në përkufizimin e kësaj, kanë djegur pretendimet që mund të kishin për kompetenca dhe përgjegjësi në Parlament, nuk mund të injorohet fakti se ata, gjithsesi, përfaqësojnë një pjesë domethënëse të votuesve shqiptarë.

“Për këto arsye, ne e kemi lavdëruar marrëveshjen e 5 qershorit, të arritur nëpërmjet bisedimeve ndër-partiake; përshëndetëm miratimin në Parlament në 23 korrik të kodifikimit të marrëveshjes së 5 qershorit; dhe nënvizuam gjithëpërfshirjen dhe transparencën me të cilat partitë arritën marrëveshjen e 5 qershorit duhet të jenë norma në marrjen e veprimeve të rëndësishme kombëtare. Partitë duhet të përfshihen në Këshillin Politik me mirëbesim”, thotë ambasada.

Më tej shtohet se drejtuesit përkatës kanë deklaruar se çdo veprim i Parlamentit nesër nuk i mbyll negociatat e nisura në Këshillin Politik rreth listave të hapura dhe koalicioneve.

“Ne do të shohim nëse drejtuesit do ta mbajnë fjalën e tyre”, deklarohet në vijim.

Në mbyllje bëhet thirrje se të gjitha partitë duhet të vazhdojnë të përfshihen, në mënyrë që ligjet të cilat do të miratohen në fund, të jenë rezultat i një procesi transparent dhe përfshirës, në interes të të gjithë popullit shqiptar, dhe që e çojnë vendin përpara në rrugën demokratike dhe se ky është një detyrim që udhëheqësit shqiptarë e kanë përpara popullit shqiptar. /a.y/noa.al