Dikur ishin Partizani dhe Dinamo ekipet e privilegjuara të shtetit, tani është Tirana.

Dinamo prej kohësh në një kategori më poshtë, përmes faqes së tifozëve të saj, ka reaguar pas vendimit të kryebashkiakut Erion Veliaj, që dha 150 milion lekë shpërblim për titullin e 25-të kampion të bardhebluve.

"Veliaj jep 150 milionё lekё pёr Titullin e KF Tiranёs (tё dhuruar nga FṨHF pёr pёrvjetor). Me taksat tona lajmë borxhet e Refikut".

"Skuadra e Shtetit dhe e Politikës që nga themelimi i saj, akoma majmet me taksat e të gjithë banorëve të kryeqytetit(!). Drejtësi e Barazi për të 3 klubet nga Bashkia Tiranë, ose ka ardhur koha për të mos paguar taksa", ka qenë reagimi i tifozëve të Dinamos në faqen e tyre.

Pakënaqësi, ndonëse jo zyrtare, ka pasur edhe nga Partizani. Gjithsesi njihet rivaliteti mes tre ekipeve të kryeqytetit.

Reagimi vjen pasi sot nga salla e Këshillit Bashkiak, kryetari i Bashkisë së Tiranës, Erion Veliaj dha lajmin e mirë për të shpërblyer ekipin kampion të Tiranës. Përfitues nga fondi i akorduar nga Bashkia e Tiranës nuk do të jenë vetëm 11 lojtarët që zbresin në fushë, por i gjithë ekipi i Tiranës, të cilët i bënë kryeqytetit dhuratën më të bukur në këtë 100-vjetor të themelimit të klubit, por edhe të shpalljes kryeqytet.

"Ky shpërblim do të shkojë për të gjithë skuadrën, jo vetëm për ata 11 që zbresin në fushë. Pavarësisht se është një ekip kryesor që del në fushë, ky është vendimi i parë me një urim të përzemërt për Tiranën".

"E di që shumë veta thoshin dje pse s’ka bërë urim Lali Eri si ca politikanë të tjerë, por politikanët e tjerë ndoshta fjalët i kanë të tepërta, kur flasim ne të bashkisë, urimet nuk bëhen me duart bosh, por me duart plot, teksa bëmë edhe një analizë me klubin se çfarë do të ishte një shpërblim i arsyeshëm”, theksoi Veliaj, lidhur me vendimin./NOA.al