Përkeqësohet situata e koronavirusit në vend, ku në 24 orët e fundit janë shënuar 25 raste të prekurish të konfirmuara.

Kjo pasi janë testuar 173 qytetarë si të dyshuar të prekur me Covid-19 dhe janë konfirmuar 25 raste pozitive. Më konkretisht janë 24 të prekur në Tiranë dhe 1 në Durrës.

Ndër rastet e reja janë 15 të prekur në një call-center, kontakte të një rasti pozitiv të identifikuar dy ditë më parë.

Sakaq ka shkuar në 33 numri i viktimave në vend, pasi mëngjesin e sotëm ka ndërruar jetë në mënyrë të papritur, një pacient 69-vjeçar nga Tirana, me inicialet S.K., i cili po trajtohej në terapi intensive në spitalin infektiv.

Shifrat e fundit u bënë me dije nga Mirela Cami, drejtoresha e Operatorit të Shërbimeve të Kujdesit Shëndetësor, informoi se në 24 orët e fundit ka sërish shtrime të reja në spitalin infektiv, ku aktualisht po trajtohen 17 pacientë, nga të cilët 3 janë në terapi intensive.

Në 24 orët e fundit ka rritje të numrit të të prekurve, të lidhura me kontakte të rasteve të mëparshme pozitive por edhe vatra të reja në Tiranë.

Nga fillimi i epidemisë janë kryer mbi 14500 testime molekulare dhe serologjike, ndërsa numri i rasteve të konfirmuara pozitivë në të gjithë vendin është 1029. Prej tyre, rreth 78% janë të shëruar.

Në vendin tonë aktualisht janë 193 persona aktivë me COVID19, kryesisht ne Tiranë, Durrës Krujë, Shkodër.

Shpërndarja gjeografike e rasteve aktive është si Tiranë 80; Durrës 54; Krujë 24; Shkodër 12; Berat 10; Kamëz 9; Fier 2; Mirditë 1 dhe Korçë 1. /a.y/noa.al