Transmetuar më 22-05-2020, 16:24

Duke qëndruar në të njëjtën linjë me kryedemokratin Basha, kryetarja e LSI-së, Monika Kryemadhi shprehet se reforma zgjedhore dhe përfundimi i saj sa më parë mbetet prioriteti kryesor.

Në një reagim në Facebook, Kryemadhi thotë se shembja e Teatrit Kombëtar ishte provokim i Ramës për të na detyruar të largohemi nga tryeza e reformës zgjedhore.

Por pavarësisht të gjithave, nënvizon se puna për reformën zgjedhore nuk do të ndalet.

Reagimi i Monika Kryemadhit

LSI nuk ka asnjë qëndrim të ndryshëm nga qëndrimi që ka bërë të njohur në emër të Opozitës së Bashkuar kryetari i PD-së zoti Lulzim Basha.

Përmbushja e të gjitha detyrimeve ndaj reformës zgjedhore ka qenë dhe mbetet prioriteti im si Kryetare e LSI-së, ndaj do të vazhdoj të bëj të gjithë presionin e nevojshëm, që ajo të realizohet me konsensus dhe sa më parë, si kusht i rëndësishëm për të rikthyer legjitimitetin e vullnetit të qytetarëve shqiptarë.

Shembja e paligjshme e Teatrit Kombëtar dhe përdorimi i dhunës policore mbi artistët, mbi gazetarët, mbi veprimtarët e shoqërisë civile dhe përfaqësuesit e opozitës, është provokimi i rradhës së Edi Ramës ndaj opozitës dhe qytetarëve shqiptarë, i cili edhe në sallën e Kuvendit vazhdoi me të njejtën gjuhë fyese dhe provokative, për të na detyruar të largohemi nga tryeza e reformës zgjedhore.

Por pavarësisht dhunës policore, pavarësisht gjuhës fyese, provokuese dhe urrejtjes së Edi Ramës, e ritheksoj edhe një herë se ne jemi të vendosur të realizojmë reformën zgjedhore dhe largimin përfundimtar të tij nga pushteti, si kusht për rikthimin e demokracisë në vend.