Shembja e Teatrit Kombëtar, Kosova proteston dhe anullon shfaqjet
Transmetuar më 17-05-2020, 18:34

Shoqata Sindikale e Teatrit Kombëtar të Kosovës, në shenjë solidariteti me protestat në Tiranë, pas shembjes së objektit të Teatrit Kombëtar, ka organizuar një protestë simbolike.

Këta të fundit kundërshtojnë veprimin e qeverisë shqiptare dhe Bashkisë së Tiranës.

Me thirrjet “Muret i shembët, por jo Teatrin”, “Unë jam Teatri”, të dielën para Teatrit Kombëtar në Prishtinë është organizuar aksion simbolik, ku dhjetëra qytetarë e artistë për më shumë se 10 minuta kanë qëndruar me pankartat në duar, duke respektuar distancën fizike, në shenjat e kuqe që janë bërë te sheshi “Skënderbeu”, në kryeqytet.

Në shenjë solidariteti kundër shembjes së ndërtesës së Teatrit Kombëtar në Tiranë, Teatri Kombëtar i Kosovës, Teatri i Gjilanit, Teatri “Hadi Shehu” – Gjakovë”, Teatri “Bekim Fehmiu” Prizren, Teatri “Adriana” – Ferizaj”, Teatri “Muharrem Qena” – Mitrovicë, Qendra Multimedia”, “Teatri Oda”, Teatri “Urban”, “Etno Teatri – Kukaj”, kanë anuluar shfaqjen “Skënderbeu ose dashuri dhe liri”, e cila ka qenë e planifikuar në kuadër të kalendarit online./noa.al/

Loading...