Një i moshuar është vrarë me thikë pasditen e sotme.

Ngjarja ka ndodhur në një zonë periferike të Poliçanit. Viktimë ka mbetur 73-vjeçari Ramadan Çela.

Shkaqet e ngjarjes janë ende të panjohura, por dyshohet se gjithçka ka nisur pas një sherri të çastit.

Policia ka shkuar në vendin e ngjarjes dhe mësohet se është bërë edhe arrestimi i autorit të krimit.

Ai është 37-vjeçari Hamza Çela.

NJOFTIMI NGA POLICIA

Policia identifikon dhe vë në pranga autorin e vrasjes me thikë të 77-vjeçarit.

Rreth orës 17:30, në fshatin Jaupas, Skrapar, shtetasi H. Ç., 37 vjeç, pas një konflikti për motive të dobëta, ka qëlluar me mjet prerës (thikë) komshiun e tij që ndodhej vetëm në banesë, shtetasin R. Ç., 77 vjeç, i cili për pasojë ka ndërruar jetë.

Menjëherë pas marrjes së informacionit për ngjarjen e ndodhur, shërbimet e Komisariatit të Policisë Skrapar kanë rrethuar zonën dhe falë reagimit të menjëhershëm dhe informacioneve të marra në rrugë operative kanë bërë të mundur identifikimin dhe arrestimin e autorit.

Në cilësinë e provës materiale grupi hetimor ka sekuestruar armën e krimit, një mjet prerës (thikë).

Grupi hetimor, nën drejtimin e Prokurorisë po punon për zbardhjen e plotë të rrethanave të ngjarjes. /k.k/noa.al/