Silva Bino, specialistja e Institutit të Shëndetit Publik, iu drejton një mesazh qytetarëve në kushtet e lehtësimit të masave të koronavirusit.

Në mesazhin e saj, profesoresha e ISHP thotë se virusi nuk është zhdukur, as nga Shqipëria, as nga Europa dhe as nga bota, por se virusi qarkullon dhe për këtë duhet të jemi të kujdesshëm.

“Kam një mesazh për të gjithë qytetarët, pasi jemi në fazën e hapjes, lëvizjes, dhe duhet të jemi të kujdesshëm. Virusi nuk është zhdukur, as nga Shqipëria, as nga Europa dhe as nga bota. Virusi qarkullon dhe për këtë ne duhet të jemi të kujdesshëm. Pavarësisht se dalim, duhet të jemi të përgjegjshëm për sjelljen tonë, pasi sjellja individuale është shumë e rëndësishme në këtë fazë. Faza që kaloi na ndihmoi të zbusnim kurbën e sëmundjes, që të mos kishim një ritëm të lartë të sëmundjes, të përhapjes së sëmundjes, por aktualisht ne duhet të jemi të përgjegjshëm dhe gjithë atë muaj të sakrificës ta kemi në favorin tonë", thotë Bino.

Ajo shton se për këtë, janë sjelljet e qytetarëve, që duhet të jenë sa më të përgjegjshëm, të mos përqafohen, të mos shtrëngojnë duart, por të ruajnë distancë me njëri-tjetrin, pasi virusi mund të transmetohet gjatë përqafimeve, prekjes së duarve apo objekteve.

Sipas saj, ruajtja e distancës, higjiena, mbajtja e maskës në mjedise të grumbulluara, në supermarkete a dyqane që kanë mbi dy veta, do të na ndihmonte të ruanim veten dhe personat e tjerë që mund të kalojnë forma të rënda të sëmundjes që i pamë gjatë këtij shpërthimi epidemik në vendin tonë dhe të mos mbingarkojmë spitalet. /a.y/noa.al