“Arrest me burg” ka vendosur Gjykata e Durrësit, për të dyshuarit si vrasës të dy vëllezërve Viktor Haxhia dhe Besmir Haxhia.

Altin Ndoci dhe shoku i tij Klevis Alla, do të qëndrojnë në qeli në vijim të hetimeve ndaj tyre, teksa krahas krimit të 27 prillit, akuzohen edhe për ekzekutimin e dyfishtë të ndodhur po në Durrës, ku mbetën të vrarë 24-vjeçari Anxhelo Avdia dhe 35-vjeçari Dorian Shkoza.

Avokati mbrojtës i të dyshuarit kryesor Altin Ndoci, Saimir Visha tha në dalje të gjykatës se klienti i tij mohon kategorikisht krimin, madje i ka miq.

“Klienti im shprehet se nuk e ka kryer krimin. Në seancë nuk u paraqit asnjë provë nga prokuroria, ndihet i shokuar se dy viktimat i ka pasur lidhje miqësore dhe familjare. Ka shkuar edhe në varrim edhe për të tretat, dhe ndihet i shokuar pse e vendos gishtin policia tek ai”, tha Visha.

Po ashtu shtoi se për shkak të veprës së rëndë gjykata caktoi arrest me burg, por sipas tij për klientin e tij nuk ka prova.

Gjatë operacionit të koduar “Shën Vlash” ku u arrestuan Ndoci dhe Alla, në një kanal midis Shkozetit dhe Nishtullës, nga Forcat Speciale “Renea” u bë e mundur gjetja e armëve të zjarrit të përdorura për të kryer krimin, ndërsa në Arapaj u gjet dhe automjeti i përdorur nga të dyshuarit.

Në cilësinë e provës materiale u sekuestruan 3 armë zjarri kallashnikov, municion luftarak, 12 aparate telefonik të përdorur e prova të tjera të vlefshme që do i shërbejnë hetimit për dokumentimin e plotë të këtyre ngjarjeve. /a.y/noa.al