Dy ish-deputetet demokrate Albana Vokshi dhe Oriola Pampuri nga një masoneri në Fushë Krujë deklaruan se fasoneritë janë si bomba me sahat dhe ato duhen çaktivizuar.

Ato bënë qeverinë përgjegjëse për përkeqësimin e situatës së koronavirusit në Krujë.

Vokshi deklaroi se fasoneritë janë bomba me sahat dhe se brenda pak ditëve janë 40 të infektuar në Krujë, 27 në Laç.

“Vatrat e infeksionit janë fasoneritë dhe më të prekurat janë vajzat dhe gratë. Vajzat dhe gratë që punojnë në fasoneri janë më të pambrojturat. Arsyeja e vetme është se qeveria nuk do që t’ia dijë për to. Për Edi Ramën ka rëndësi që të mos i mërziten klientët me të cilët vjedh dhe pasurohet vetë, jo shëndeti i mbi 70 mijë vajzave dhe grave që punojnë në fasoneri. Është jetike që qeveria të mbyllë menjëherë këto biznese që janë vatra të rrezikshme për përhapjen e shpejtë të infeksionit. Kemi 5 javë që ia themi Edi Ramës, por ai vepron me kokëfortësi. Rezultati i kokëfortësisë së Edi Ramës është 67 persona të prekur brenda 3 ditëve vetëm nga fasoneritë e Krujës”, u shpreh Vokshi.

Ajo tha se shëndeti i grave dhe i vajzave duhet të jetë prioritet i qeverisë dhe se Edi Rama duhet të hapë sytë dhe të vendosë për më të mirën e grave, pasi gratë dhe vajzat nuk janë mish për top që ai t’i përdorë si statistika kur i duhen politikisht.

“Ato janë nëna fëmijësh që për shkak të vendimeve të gabuara të qeverisë së Edi Ramës, po infektojnë edhe fëmijët e tyre. Gjendja është e rëndë. Nuk duhet të presim që të hyjnë të gjitha gratë në karantinë që të mbyllen fasoneritë. Vendimi duhet marrë sot. Po sot duhet marrë edhe vendimi për mbështetjen financiare të këtij biznesi. Asgjë nuk i kushton qeverisë të shpëtojë nga rreziku jetën e mbi 70 mijë grave dhe vajzave duke anuluar 3 koncesionet e inceneratorëve. Me paratë e tyre, e përballon fare mirë pagën për këto gra dhe vajza që shkojnë në punë me frikë dhe jetojnë me tmerrin e virusit”, tha Vokshi.

Nga ana e saj Pampuri deklaroi se është e padrejtë që qeveria të vendosë me mijëra gra dhe vajza nën presionin e përballjes me sëmundjen 10 orë në ditë pa pushim.

“Mund të them se ky është një veprim armiqësor ndaj grave dhe vajzave, pasi me stresin e Erindës punojnë të gjitha gratë në Krujë dhe në çdo fasoneri. Në fasoneritë shqiptare është e pamundur që të krijohen kushtet e duhura për distancimin social, për shkak të mjediseve të vogla. Jo vetëm në Krujë, por në të gjithë Shqipërinë, situata është e njëjtë. Sado që punëdhënësit përpiqen të krijojnë kushtet, kjo është e pamundur. Vetëm një vendim i qeverisë për mbylljen dhe pagesën e tyre e zgjidh problemin”, deklaroi Pampuri.

Sipas saj të dhënat nxjerrin në pah sesa larg realitetit është qeveria e Edi Ramës dhe sa pak kujdeset ajo për shtresat me të pambrojtur, teksa theksoi se gratë dhe vajzat në fasoneri punojnë me një pagë minimale.

Për zyrtaren demokrate, gratë dhe vajzat nuk e meritojnë që të diskriminohen nga qeveria.

“Pse Edi Eama duhet ta ruajë veten, familjen e tij, gratë e qeverisë së tij, deputetet e tij duke bërë mbledhje online, ndërsa grave dhe vajzave që punojnë në fasoneri u thotë me arrogancë që duhet të shkoni në punë dhe të përballeni me virusin? Në zonën e Krujës janë në punë 20 fasoneri. Të gjitha bomba me sahat. Duhen mbyllur sot. Aty punojnë rreth 5 mijë gra e vajza nga zonat përreth, prandaj virusi është përhapur me shpejtësi edhe në Kurbin. 60 të prekur brenda pak ditësh është katastrofë”, tha Pampuri.

Ajo deklaroi në përfundim se vendimi për mbylljen e tyre duhet marrë sa nuk është vonë, duke ftuar Kryeministrin, “Le të sakrifikojë Rama një vjedhje më pak, një favor më pak për klientët e tij. Gratë, vajzat dhe familjet e tyre nuk duhen lënë në dorë të fatit”. /a.y/noa.al

PËRDITËSIM LIVE