Koronavirusi në Kosovë/ Të rinjtë në të 20-at më të prekurit nga virusi i ri
Transmetuar më 28-03-2020, 18:26

Instituti Kombëtar i Shëndetësisë Publike ka bërë të ditur se të rinjtë e moshave nga 20 deri në 29 vjeç janë prekur më shumë nga koronavirusi i ri në Kosovë.

Nga 88 personat e infektuar me këtë sëmundje, 20 prej tyre i përkasin kësaj moshe, ndërkohë që vetëm 9 persona të prekur janë të moshës mbi 70-vjeçare.

Sa i përket gjinisë, 53% e meshkujve janë prekur nga sëmundja Covid-19 që shkakton koronavirusi, në krahasim gratë që përbëjnë 47 për qind të numrit të të infektuarve.

Malisheva është qyteti i prekur më shumë nga kjo sëmundje në Kosovë, me 32 raste të regjistruara, i ndjekur nga Gjilani me 15 raste dhe Prishtina më 11 raste.

Sipas të dhënave të publikuara, më 23 mars është raportuar për numrin më të madh të të prekurve me këtë sëmundje, 23 brenda 24 orëve.

Përveç 88 personave të infektuar në Kosovë deri më tani ka vdekur edhe 1 pacient nga kjo sëmundje.

Me qëllim të parandalimit të përhapjes së koronavirusit të ri, Qeveria në largim e Kosovës ka shpallur gjendje emergjente për shëndetin publik.

Loading...