Ministria e Shëndetësisë konfirmon zyrtarisht rritjen e numrit të të prekurve me koronavirus, ku gjatë orëve të fundit janë shtuar dy raste të reja.
Në konferencën për mediat lidhur me situatën prej koronavirusit në vend, zëvendës ministrja e Shëndetësisë Mira Racakolli konfirmoi se numri i të prekurve ka shkuar në 12.
Ajo deklaroi se në total janë testuar 157 njerëz të dyshuar, nga këta 9 me kontakte me pacientin e parë dhe tre raste të tjera më vete.
Zv.ministrja bëri me dije se janë kryer 43 testime të reja, ku kanë rezultuar pozitive vetëm dy raste.
"Njëri prej tyre është i lidhur me rastin e parë, tjetri një i moshuar në Lushnje 78 vjeç, i cili ka udhëtuar nga Bergamo. Të dyja rastet janë në vetë izolim dhe janë në gjendje të mirë shëndetësore. 157 njerëz të dyshuar në total, 12 janë pozitiv. Lidhur me gjendjen e tyre shëndetësore, 3 janë të shtruar në Infektin në gjendje stabël, një në Durrës në terapi intensive dhe 7 janë në vetëizolim, pa shenja klinike”, deklaroi Rakacolli.
Ajo shtoi se po vijon gjurmimi i rasteve të tjera.
Sakaq 104 persona, kontakte të personave të identifikuar me COVID janë në vetëkarantinim. Zv.ministrja u shpreh e sigurt se ka aparatura të mjaftueshme për oksigjen.
“Maska oksigjeni ka me miliona. Aparatura oksigjenimi ka në çdo spital. Janë totalisht të mjaftueshme. Qeveria ka vënë në dispozicion 400 milionë lekë për koronavirusin”, deklaroi ajo.
Zv.ministrja apeloi që të gjithë personat që kanë hyrë në Shqipëri nga zonat me rrezik epidemiologjik të plotësojnë skedën e udhëtarit në pikat hyrëse dhe të vetëkarantinohen detyrimisht për një periudhë 14 ditore nga data e hyrjes në fuqi.
Të dhënat e plota nga Ministria e Shëndetësisë
Identifikohen edhe dy raste të reja me COVID-19 në Shqipëri, njëri prej të cilëve ka lidhje kontakti me rastin e parë të identifikuar, ndërsa një rast i ri është konfirmuar në Lushnje. Zv.Ministrja e Shëndetësisë Mira Rakacolli, në komunikimin e përditshëm me mediat ka deklaruar se në 24 orët e fundit janë kryer edhe 43 testime të reja.
“Në 24 orët e fundit janë kryer edhe 43 testime të reja, nga të cilat kanë rezultuar dy raste pozitive me COVID-19. Njëri prej tyre është i lidhur me rastin e parë të identifikuar me koronavirusin e ri ndërsa rasti tjetër është një i moshuar në Lushnje, me histori udhetimi me Italine. Të dy rastet e reja në vetëizolim dhe në gjendje të mirë shëndetësore. Në total deri në këto momente, janë testuar 157 të dyshuar për COVID-19 dhe janë 12 persona të identifikuar pozitiv: Prej tyre, 9 kanë lidhje kontakti me rastin e parë të identifkuar dhe 3 janë raste të reja: 1 në Tiranë, një në Lushnje dhe një në Durrës” tha Rakacolli.
Duke folur për gjendjen e tyre shëndetësore, Rakacolli deklaroi se 4 persona janë të shtruar në spital, 3 prej të cilëve në gjendje të qëndrueshme shëndetësore në Spitalin Infektiv të Tiranës dhe një në terapi intensive në Durrës, ndërsa 7 prej personave të identifikuar COVID-19 pozitiv janë në vetëizolim pa shenja klinike të infeksionit respirator. 104 persona, kontakte të personave të identifikuar me COVID19 janë në vetëkarantinim.
Zv.ministrja Rakacolli vuri theksin se institucionet dhe qytetarët duhet të tregohen të kujdesshëm dhe të zbatojnë me përpikmëri masat e bëra publike urdhrat e firmosur nga ministrja Manastirliu.
Urdhri i ri i firmos nga Ministrja e Shëndetësisë dhe Mbrojtjes Sociale Ogerta Manastirliu për masat për parandalimin e përhapjes së COVID-19:
Mbyllja për publikun deri në datë 03/04/2020 të
a.Ambienteve që ofrojnë shërbime në lokale nate
b.Të ambienteve të mbyllura të dedikuara për argëtimin e fëmijëve dhe të rinjtë, aktiviteteve në palestra, qendra sportive, pishina, qendra internet, qendra kulturore dhe argëtimi
2-Ndalimin deri në datë 03/04/2020 të:
a.Aktiviteteve sportive, sociale dhe kulturore;
b.Eksursioneve mësimore të organizuara prej institucioneve shkollore me destinacion brenda ose jashtë vendit;
c.Procedurave të konkursit për punësim personeli, konkurse shkollimi dhe specializimi.
3-Gjatë ditës, aktivitetet e bareve, restoranteve, lokaleve të ofrojnë shërbim për klientët duke respektuar distancën prej së paku dy metrash ndërmjet tavolinave në vendet ulur, dhë në çdo rast të garantojnë distancën prej së paku një metër të njëriut nga njëriu.
4-Institucionet publike dhe private, të hartojnë sipas fushës së përgjegjësisë së tyre brenda datës 11.03.2020 një plan masash për sigurimin e ofrimit të shërbimeve prioritare, duke prioritizuar kategoritë e shërbimit kryesisht nëpërmjet ofrimit të shërbimit online, punës në distancë, dhe vetëm në raste të domosdoshme të ofrojnë shërbimin ndërmjet kontaktit fizik. Për shërbimet për të cilat nevojitet kontakti i drejtpërdrejtë me publikun institucionet duhet të pajisin personelin me mjete pune mbrojtëse me qëllim ruajtjen e shëndetit të tyre.
5-Institucionet publike që ofrojnë shërbime pritjeje për publikun në sportel të marrin masa për të shfrytëzuar maksimalisht shërbimet online dhe platformën e-albania.
6-Organet e shërbimit postar duhet të garantojnë vazhdimimësinë e shërbimti dhe të hartojnë një plan masash për të kufizuar kontaktet e punonjësve me publikun dhe për të shmangur grumbullimin e publikut në sportele apo ambiente të tjera të brendshme.
7-Detyrohen të gjithë personat që kanë hyrë në Shqipëri nga zona me rrezikepidemiologjik të identifikuara të tilla prej Organizatës Botërore të Shëndetësise, të plotësojnë skedën e udhëtarit në pikat hyrëse kufitare dhe të vetëkarantinohen detyrimisht për një periudhë 14 ditore nga data e hyrjes në kufi./a.y/noa.al
Koronavirusi në Shqipëri, Qeveria mbyll shkollat, ndërpriten fluturimet me veriun e Italisë