Ndarja nga jeta e Nexhmije Pagarushës, Meta: Artiste që bëri histori në momente të vështira
Transmetuar më 07-02-2020, 12:06

Presidenti Ilir Meta reagon lidhur me ndarjen nga jeta të këngëtares së njohur Nexhmije Pagarusha.

“Me shumë dhimbje e hidhërim të thellë mora lajmin tragjik të ndarjes nga jeta të Mbretëreshës së këngës shqiptare, artistes sonë të madhe e të papërsëritshme, Nexhmije Pagarusha. E dashur dhe e admiruar nga të gjitha brezat për vokalin e jashtëzakonshëm, emocionet dhe krenarinë që i dhuroi kombit në dekada, kjo humbje e pazëvendësueshme i ka prekur sot të gjithë shqiptarët dhe admiruesit e saj kudo”, thotë Meta, teksa ndan një fotografi me këngëtaren e ndjerë.

Ai shton se si artiste që bëri histori në momente të vështira, falë talentit artistik, personalitetit fisnik e të spikatur, Nexhmije Pagarusha, do jetë përherë një model referimi për brezat e rinj të artistëve, një yll i pashuar i muzikës shqiptare, këngët e së cilës do të këndohen përjetë.

“Unë isha fatlum ta njihja nga afër dhe të ndaja me të shumë momente të bukura dhe të paharrueshme. Ajo nuk ishte magjike, vetëm në skenë dhe ekran, por në çdo moment të jetës së saj. Duke ndarë dhimbjen e thellë për këtë humbje të madhe, u shpreh ngushëllimet më të sinqerta familjes, të afërmve, bashkëpunëtorëve dhe të gjithë artdashësve shqiptarë”, shkruan keu i shtetit.

Si një nga përfaqësueset më të mëdhaja të artit e muzikës, e nderuar dhe vlerësuar ndërkombëtarisht, me trashëgiminë e vyer që la pas, sipas Metës, Nexhmije Pagarusha do të mbetet e paharruar për të gjithë ne. /a.y/noa.al

Ndahet nga jeta këngëtarja Nexhmije Pagarusha, mbretëresha e këngës shqipe

Loading...