Presidenti Ilir Meta ka bërë urimin e tij për natën e ndërrimit të viteve dhe për fillimin e Vitit të Ri 2020.

‘Në këtë festë tradicionale të ndërrimit të viteve, të bashkimit dhe solidaritetit njerëzor e shpirtëror pranë vatrave të ngrohta familjare, të takimit me të dashurit e zemrës dhe miqtë tuaj në tryezat e gëzimit, shpresave dhe ëndrrave të reja, kam kënaqësinë t’i bashkohem urimit të përzemërt’, tha Meta.

Presidenti uroi një vit të mbarë e të begatë për çdo familje shqiptare. Nuk la pa përmendur faktin që Viti i Ri mund të hapë negociatat për të futur Shqipërinë në BE.

‘Zhgënjimet që po lemë pas me vitin e vjetër, le të na ndihmojnë për një reflektim të thellë e të sinqertë në mënyrë që viti 2020 të jetë viti i realizimit të shpresave dhe ëndrrave të çdo shqiptari dhe familje shqiptare, por edhe viti që e afron Shqipërinë me familjen europiane dhe standardet e saj! Çdo shqiptar i ndershëm dhe punëtor kërkon më shumë shpresë dhe meriton mirëqenie, por edhe ndihmë, përkrahje e mbështetje, për të ndërtuar një jetë të denjë dhe një të ardhme të sigurt në Atdheun tonë’, u shpreh Meta.

Në vëmendjen e Presidentit vijon të mbetet katastrofa që goditi Shqipërinë më 26 nëntor.

‘Solidariteti mbarëkombëtar që treguam pas tërmetit tragjik, është një themel i fortë dhe i qëndrueshëm, që na frymëzon të gjithëve dhe na jep besim për sfidat që na presin! Sot ne shkëmbejmë urimet më të mira për Vitin e Ri, por nga 1 janari duhet të mendojmë dhe të punojmë më shumë, të gjithë së bashku, për t’i dhënë dritë dhe shpresë të ardhmes sonë dhe të fëmijëve tanë në Atdheun tonë!

E ardhmja është në dorën e secilit prej nesh dhe të bashkuar  do t’ia dalim!

Numërimi mbrapsht ka filluar! Le të jetë 2020 viti i ndryshimit të madh!

Gëzuar në çdo vatër shqiptare! Zoti e bekoftë shqipërinë dhe kombin shqiptar! ’, përfundoi Presidenti. /a.m/noa.al/