Tërmeti i fuqishëm i 26 nëntorit nuk ka shkaktuar dëme vetëm në banesa, por edhe në institucione shtetërore.

Ministria e Financave njoftoi se ka patur dëme të shumta në strukturën e godinës së Drejtorisë të Përgjithshme të Doganave.

“Nga drejtuesit e këtij institucioni aktualisht janë marrë të gjitha masat për evaukimin  e punonjësve në godina të tjera, cka garanton mirëfunksionimin e punës dhe ofrimin e shërbimeve ndaj qytetarëve dhe biznesit. Nga DPD është miratuar “Manuali mbi mënyrën e funksionimit të sistemit doganor lidhur me deklarimin, verifikimin, kontrollin dhe çlirimin e mallrave në raste emergjence”, thuhet në njoftimin e Ministrisë.

Sipas akt konstatimit të inspektorëve të Institutit të Ndërtimit,  godina është jashtë funksionit.

Punonjësit janë transferuar pranë zyrave të AKSHI-t, si dhe është kryer zhvendosja e sektorëve kyç (VQ dhe SKAO) pranë zyrave të disponueshme në gjendje pune.

Ndërsa degët doganore kufitare, edhe të brendshme, në çdo moment kanë funksionuar me kapacitete të plota.