Nis kampionati/ Kukësi tregon forcën përballë Partizanit, Lerda: U vendos nga një penallti (Foto)
Transmetuar më 23-08-2019, 23:01

Kukësi fiton ndaj Partizanit në “Elbasan Arena”, duke e nisur sezonin e ri me pretendime të mëdha për titullin e parë kampion në histori.

Sot nisi sezoni i ri futbollistik, me kryendeshjen e javës që vuri përballë kampionët në fuqi dhe nënkampionët e sezonit të fundit.

Fati i këtij takimi u vendos nga një 11 metërsh. Boldor pengon në zonë Et’hemin pesë minuta para se të mbyllej pjesa e parë dhe gjyqtari Enea Jorgji nuk pati dyshime, duke treguar nga pika e bardhë. Vasil Shkurtaj realizoi golin e fitores.

Në pjesën e dytë Partizani kërkoi barazimin me çdo kusht, por nuk ia doli. Trau i mohoi Malës rastin më të mirë për të kuqtë, që të barazonin shifrat. Nesër luhet ndeshjet e tjera të javës.

Kukësi-Partizani 1-0

Shënues: Vasil Shkurtaj 39 (11-m)

Kukësi: Avdyli, Obanor, Teqja, Lulaj, Musta, Maliqi, Et’hemi, Musolli, Limaj, Gavazaj (Kitanovski 80’), Shkurtaj (Daku 90’). Trajner: Shpëtim Duro

Partizani: Hoxha, Boldor, Belica, Bitri (Romero 67’), Trashi, Mala, Telushi, Broja, Kordeiro (Çinari 46’), Braun, Bardhi (Solomon 46’). Trajner: Franco Lerda

Gjyqtar: Enea Jorgji

Kartonë të kuq: Solomon, Lulaj

Shpëtim Duro, trajneri i Kukësit, pas fitores në ndeshjen ndaj Partizanit, elozhe djemve

Për lojën e mirë dhe rezistencën që i bën të kuqve, në Elbasan Arena”, në ndeshjen e parë të këtij kampionati, trajneri Duro theksoi se skuadra e tij e meritoi fitoren sepse kundërshtari nuk pati asnjë rast rreziku:

“Më erdhi shumë keq si e humbëm finalen e Superkupës, sepse Kukësi tregoi nivel me një kundërshtar solid. Por për fat e humbëm në momentet e fundit”, theksoi Duro

“Gjithnjë u kam thënë djemve që jemi një skuadër shumë e mirë, por duam kohën tonë që të jemi aty ku duhet. Skuadra tregoi sot se është e aftë dhe pavarësisht organizimit të shpejtë ne ndërtuam një ekip edhe me improvizime, por jam shumë i kënaqur me fitoren”, u shpreh ai.

Trajneri i Kukësit foli edhe mbi gjendjen e ekipit, pavarësisht fitores.

“Sot u dëmtua Musolli që është një nga pikat kryesore. Shpresoj që ai të rikuperohet, por që të kem nesër në stërvitje edhe Abazjan që është një forcë e madhe në sulm. Natyrisht që do të shohim edhe për ndonjë lojtar tjetër gjatë javës që të kompletohemi dhe të përballojmë sezonin”, tha ai ndërsa i bëri  elozhe Valon Et’hemit që ka bërë dy ndeshje me nivel të lartë, madje fitoi edhe penalltinë në sfidën e sotme:

“Et’hemi është një futbollist polivalent dhe në të dyja ndeshjet më ka bërë shumë përshtypje për mënyrën se si luan. Është superlojtarë dhe super djalë. Në pozicionin e ri ka bërë ndeshje të jashtëzakonshme. Unë kam pasur simpati edhe kur nuk drejtoja Kukësin”.

Pas ndeshjes trajneri i Partizanit, Franco Lerda: Bëmë shumë gabime:

“Kukësi bëri një pjesë të parë më të mirë, ne e bëmë të dytën. Ata bënë një gol, ne jo. Ata e ndërtuan lojën në gabimet që bëmë ne. Bëmë shumë gabime. U munduam t’i rikuperojmë në pjesën e dytë, por ka qenë e vështirë”.

I pyetur që të humbasësh në javën e parë, e vendos ekipin në presion?

“Takimi u vendos nga një penallti, e më duket shumë e dyshimtë. Për sa i përket lojës, humbja është njësoj, si ndeshjen e parë, edhe të dytën apo një tjetër. Disa lojtarë të mitë nuk ishin rikuperuar”, theksoi ai.

Telushi ishte vetëm në fushë, pa ndihmë nga Kordeiro apo Broja. Çfarë nuk funksionoi me të në pjesën e parë? “Kemi bërë shumë gabime në pjesën e parë. Anësorët ishin më lart se duhet, dhe Kukësi merrte iniciativën në disa gabime tonat në pasim. Në pjesën e dytë përmirësuam shumë gjëra, bëmë dhe shtyllë”, tha trajneri italian.

“Është nga ato ndeshje që nuk ka shumë raste, dhe ne nuk i shfrytëzuam. Por, edhe Kukësi, përveç penalltisë, nuk bëri shumë në sulm.Në pjesën e parë nuk bëmë lojë të mirë, por në të dytën ekipi më pëlqeu, kundër një ekipi si Kukësi që ka lojtarë cilësorë në ekip.”

Lidhur me rolin e Boldor, trajneri i Partizanit u shpreh, “Boldor luan edhe në të majtë, por mund t’i bëjë të gjitha. Më ka pëlqyer aty ku e kam vendosur. Të 3 qendërmbrojtësit më kanë pëlqyer, por kemi stonuar në lojtarët e krahut, që ngjiteshin në mesfushë.

Për kartonin e kuq të Solomon, italiani shtoi se “Nuk e di nëse e ka prekur me kokë. Por, arbitri e ka parë më mirë.” /a.m/noa.al

Loading...
Loading...