Hapja e negociatave për Shqipërinë, ambasada e Holandës: Do ishte vendim i parakohshëm
Transmetuar më 12-06-2019, 22:50

Ambasada e Holandës në Tiranë ka reaguar pas votimit të parlamentit të këtij vendi kundër hapjes së negociatave të Shqipërisë me Bashkimin Europian.

Në deklaratë theksohet se Hollanda mbetet e vendosur për perspektivën e BE-së, për vendet e Ballkanit Perëndimor.

Në reagim, ambasada e Holandës shprehet se vlerëson dhe mirëpret hapat që ka ndërmarrë Shqipëria, në lidhje me reformën gjyqësore dhe procesin e vettingut.

“Politika e zgjerimit të BE bazohet në kushtëzimin e drejtë dhe rigoroz për të siguruar që reformat në vendet që aspirojnë të bashkohen me Bashkimin janë të qëndrueshme dhe të pakthyeshme dhe të dhënat janë të qëndrueshme. Hollanda vlerëson dhe mirëpret hapat që ka ndërmarrë Shqipëria, veçanërisht në lidhje me reformën gjyqësore dhe procesin e vettingut, një proces vërtet i unik për rajonin”, shkruhet në reagim.

Megjithatë ambasada holandeze vijon në reagimin e saj se ka ende hapa të tjerë, veçanërisht sipas saj në luftën kundër korrupsionit dhe krimit të organizuar, që Shqipëria ende duhet të marrë përpara përmbushjes së kritereve të përcaktuara nga Këshilli në qershor të vitit 2018 para se negociatat e pranimit të mund të hapen.

“Në dritën e kësaj, parlamenti i Holandës më 12 qershor miratoi një mocion që i kërkoi qeverisë të mos pranonte të hapte negociata me Shqipërinë. Një vendim i Këshillit të Çështjeve të Përgjithshme të 18 qershorit për të hapur negociatat do të ishte i parakohshëm. Ne fuqimisht inkurajojmë qeverinë e Shqipërisë që të vazhdojë rrugën e saj. Ne e kuptojmë se sa sfiduese është procesi i pranimit dhe ne do të vazhdojmë të mbështesim Shqipërinë në reformat e saj sa më shumë që mundemi, veçanërisht në fushën e sundimit të ligjit”, shkruhet në reagim./a.k/noa.al/

Loading...
loading...
Loading...