Basha: Nuk do lejojmë zgjedhje më 30 qershor në asnjë qendër të vetme votimi
Transmetuar më 26-04-2019, 00:46

Kryetari i Partisë Demokratike, Lulzim Basha, tha sot nga Miloti se Rama nuk do të jetë më në krye të qeverisë në asnjë proces tjetër zgjedhor.

"Edi Rama, kurrë më nuk do të jetë kryeministri që organizon zgjedhje në Shqipëri, sepse zgjedhjet me Edi Ramën nuk janë zgjedhje, por krim, janë farsë. Largimi i Edi Ramës është kusht i panegociueshëm i opozitës", deklaroi z.Basha gjatë tubimit në bllokimin e rrugës në Milot.

Basha pohoi se opozita reale është aty, në protestat popullore dhe nuk mund të klonohet siç po ndodh në Kuvend.

"Opozita as nuk klonohet, as nuk krijohet, siç krijohen mercenarët e Edi Ramës. E vetmja opozitë jemi ne, e bashkuar me popullin".

Në këtë pikë Basha tha se nuk do të lejohen zgjedhje lokale më 30 qershor:

"Ne jemi të vendosur që të mos lejojmë më kurrë krimin elektoral. E sotmja le të jetë një sinjal dhe paralajmërim se Edi Ramës dhe bandës së tij po i mbaron koha. Nuk do të lejojmë me asnjë çmim krimin elektoral më 30 qershor në asnjë qendër të vetme votimi".

"Ne nuk do të lejojmë me asnjë mjet, në asnjë formë, me asnjë çmim, krim elektoral, zgjedhje fallco. Zgjedhje farsë në Shqipëri nuk do të ketë më. Vetëm kështu do të mund të kthejmë stabilitetin dhe normalitetin", tha z.Basha.

Kreu demokrat i ktheu përgjigje në distancë dhe paralajmërimeve të Taulant Ballës sot në Kuvend se kush tenton të pengojë zgjedhjet do të futet në burg.

"Le ta dijë mirë Edi Rama se në burg do të shkojnë ata që cënojnë zgjedhjet, Dako, Gjiknuri, të gjithë bahkëpunëtorët politikë të Edi Ramës, që janë kapur duke trafikuar votat e shqiptarëve".

Basha lëshoi në fund dhe një mesazh paralajmërues për Ramën kur tha: "Asnjë hap pas nuk do të ketë. Asnjë kompromis me të keqen nuk do të ketë. Largimi i Edi Ramës është sot emergjencë kombëtare. Krijimi i një qeverie tranzitore, është shansi i fundit për të shmangur përballjen totale të popullit me klikën gjakpirëse, grabitqare, që sundon në mënyrë të paligjshme mbi vendin tonë"./noa.al/

Loading...
Loading...