Nesër protesta, ambasada e SHBA “shuplakë” opozitës: Qeveria legjitime, lëreni të punojë
Transmetuar më 15-03-2019, 12:28

Ambasada e Shteteve të Bashkuara të Amerikës del me deklaratë, pak orë para protestës së nesërme të opozitës.

Në këtë qëndrim thuhet se qeveria është e legjitime dhe zgjedhjet janë të njohura ndërkombëtarisht, duke i dhënë kështu një “shuplakë” opozitës

Në deklaratë thuhet se pavarësisht se protesta paqësore është një shtyllë themelore e demokracisë, nxitja apo kryerja e veprimeve të dhunshme, përfshirë edhe shkatërrimin e pronës publike, janë të paligjshme.

“Ne i nxisim të gjithë aktorët e demokracisë shqiptare që të ushtrojnë vetëpërmbajtje në protestën e 16 marsit. Ambasada e Shteteve të Bashkuara i konsideron Qeverinë dhe Parlamentin aktual të Shqipërisë të zgjedhura në mënyrë legjitime nëpërmjet zgjedhjeve të vitit 2017, të njohura ndërkombëtarisht. Ne vlerësojmë punën e mirë që është bërë në zbatimin e reformës në drejtësi në Shqipëri, si dhe përparimin në luftën kundër korrupsionit dhe krimit të organizuar. Ka ende punë për të bërë”, deklarohet më tej.

Ndërkohë që thuhet se, ata ish anëtarë të Parlamentit të cilët vendosën të braktisin mandatet, hoqën dorë nga detyrimet e tyre ndaj qytetarëve shqiptarë, duhet të lejojnë ata që duan të punojnë për të ardhmen e vendit të bëjnë punën e tyre.

“Ne mbështesim të gjithë ata që vazhdojnë të jenë të përfshirë në procesin demokratik në Parlament, në mënyrë që Shqipëria të vazhdojë të ecë përpara, drejt anëtarësimit në Bashkimin Europian”, thuhet në mbyllje.

Partia Demokratike, Lëvizja Socialiste për Integrim dhe partitë e vogla aleate, kanë thirrur ditën e shtunë më 16 mars, në ora 11.00 një protestë masive para Kryeministrisë. /a.y/noa.al