Pajisja e të rinjve me kartën e studentit pritet të finalizohet në muajin qershor të këtij viti.
Burime nga Ministria e Arsimit, thanë për televizionin SCAN, se një prej kërkesave të studentëve të shprehura edhe në protestën e dhjetorit po finalizohet dhe pritet të përfundoj në verë duke i dhënë kështu studentëve mundësinë për të shkurtuar shpenzimet e tyre financiare.
Por çfarë përfshin karta e studentit?
Sipas projektvendimit të qeverisë, të bërë publik, pajisja e studentëve me këtë kartë u jep atyre mundësinë për trajnime falas që do ti shërbej më pas për të hyrë në tregun e punës.
Gjithashtu studentët do të përfitojnë kurim falas nëpër spitale, pagim të sigurimeve shëndetësore, strehim social, lehtësira financiare në transportin publik, përfshirë edhe atë ajror.
Të rinjtë, nëpërmjet kësaj karte, do të përfitojnë hyrjen falas në biblioteka, teatro dhe muze.
Por lehtësira ka edhe për studentët që janë prindër për të cilët parashikohet regjistrimi i fëmijëve në institucionet shtetërore me tarifa të reduktuara.
Këto përfitime do të përballohen nga buxheti i ministrisë si edhe nga entet shtetërore që ofrojnë shërbimin me çmim të reduktuar me të cilët qeveria po negocion.
Më herët, kryeministri Edi Rama, ka deklaruar se po punohet për përfshirjen e Shqipërisë në rrjetin e vendeve që marrin kartë studentore europiane, gjë e cila pritet të sjellë lehtësira studentëve dhe përtej kufirit.