Një foshnjë vetëm katër muajshe ka humbur jetën në pediatrinë e Qendrës Spitalore Universitare “Nënë Tereza”, në Tiranë dhe QSUT konfirmoi se ishte prekur nga fruthi.

Në këtë mënyrë, vdekja tragjike e fëmijës së lindur prej pak muajsh, shënon viktimën e parë të fruthit në vend.

Mjekët kishin pohuar më herët se foshnja vuante nga bronkopneumonia e theksuar.

Drejtoria e Qendrës Spitalore Universitare “Nënë Tereza” bëri me dije të se fëmija me inicialet A. A., që ka humbur jetën pranë shërbimit të Reanimacionit të Pediatrisë është trajtuar në mënyrë intensive për 10 ditë nga ekipi reanimator, me mjekime bashkëkohore për një nga komplikacionet më të rënda të fruthit, atë të pneumonisë masive bilaterale.

Fëmija ishte vetëm 4 muajshe, moshë në të cilën sipas Kalendarit të Vaksinimit nuk aplikohet vaksina e fruthit.

Përveç kësaj, megjithë moshën e vogël, foshnja ka vuajtur nga infeksione të përsëritura të mushkërive, për të cilat është trajtuar disa herë.

Kjo ka bërë që kjo foshnje të pësojë një nga komplikacionet më të rënda të fruthit, pneumoninë.

Gjatë 10 ditëve të qëndrimit në Terapinë Intensive të Pediatrisë, fëmijës i janë bërë të gjitha protokollet mjekësore bashkëkohore si dhe është asistuar me frymëmarrje të drejtuar, por megjithë përpjekjet e ekipit reanimator mjekë infermierë, ishte e pamundur që foshnja të mbijetonte.

Kujtojmë që vetëm në dy javët e para të janarit, siç bën me dije ISHP-ja, janë rregjistruar 15 raste të fëmijëve të prekur nga fruthi. /noa.al/