Për të tetin vit me radhë, Kryeministri Edi Rama, bëri sot homazhe në nderim të katër viktimave të 21 Janarit 2011, ditë kur gjatë një demonstrate të thirrur nga opozita e kryesuar atëherë prej tij, pati konfrontime të dhunshme që precipituan në vrasjen e 4 qytetarëve nga forcat e Gardës së Republikës.

I shoqëruar nga familjarët e të rënëve, kreu i qeverisë është përulur para pllakave përkujtimore në bulevardin “Dëshmorët e Kombit”.

Ai ka vendosur karafila në kujtim të tyre, teksa është takuar me familjarët.

Por teksa ka qenë duke vendosur lule, një familjar i viktimave, iu drejtua: “Zoti Rama, presim drejtësinë e premtuar”, pa marrë asnjë koment nga kreu i qeverisë

Më 21 janar 2011, gjatë protestës përpara Kryeministrisë të thirrur nga kryesocialisti Edi Rama, humbën jetën protestuesit Ziver Veizi, Faik Myrtaj, Hekuran Deda dhe Aleks Nika. /a.y/noa.al