‘Unaza’, Rama flet për “DH Albania”: Qeveria dhe Gjiknuri asnjë lidhje me falsifikimin
Transmetuar më 11-01-2019, 22:49

Kryeministri Edi Rama ka folur mbrwmjen e sotme në ‘Zonë e Lirë’ edhe për tenderin e Unazës së re si dhe kompaninë “DH Albania”, e cila ka falsifikuar dokumentet.

Rama tha se qeveria dhe Damian Gjiknuri nuk kanë asnjë lidhje me falsifikimin dhe nuk mund të mbajnë përgjegjësinë për falsifikime që ndodhin në çdo vend, ndërsa shtoi se qeveria ka reaguar menjëherë dhe kjo është gjëja më e rëndësishme.

“Qeveritë, organizatat, komunitetet, familjet, nuk mbajnë përgjegjësi për gjëra që ndodhin për një arsye apo tjetër, por për mënyrën si reagojnë ndaj gjërave.

Reagimi ynë dhe i Gjiknurit, tregon se vërtet pati një procedurë të falsifikuar nga një kompani por qeveria mori iniciativën për t’i shkuar deri në fund.

Shyqyr që heton edhe FBI, që të bëhet transparencë e plotë dhe kush është përgjegjës të shkojë aty ku e meriton, por Gjiknuri ka reaguar në mënyrë imediate me partnerët amerikanë”, u shpreh Rama.

Lidhur me akuzën e Zërit të Amerikës, se institucionet e kanë ndihmuar “DH Albania” të fitojë tenderin, Rama u shpreh se kjo media e mori përgjigjen nga institucionet.