Akuzat për falsifikim nga kompania te “Unaza”, Gjiknuri: Zgjidhim kontratën nëse vërtetohet
Transmetuar më 08-12-2018, 13:28

Ministri i Energjisë ka reaguar për lajmet që qarkullojnë për falsifikimin e dokumenteve të një kompanie që ka marrë tenderin për njërin prej loteve të Unazës së Re.

Damian Gjiknuri ka thënë se nëse vërtetohen akuzat atëherë do të zgjidhet kontrata me kompaninë.

“Unë si ministër i jam drejtuar autoriteteve amerikane për verifikimin zyrtar të shqetësimit të bërë publik në media.

Kompania në fjalë nuk ka marrë asnjë qindarkë nga Buxheti i Shtetit dhe garancia e saj financiare do të sekuestrohet, në rast se dokumentat e paraqitura prej tyre në garë nuk janë autentike”, shkruan Gjiknuri në Facebook.

Ai shtoi se “në fillim-javën e ardhshme, presim përgjigjen e autoriteteve amerikane. Nëse përgjigja do të konfirmojë falsifikimin e dokumenteve nga kompania, atëherë padiskutim do të reagojmë menjëhere me zgjidhjen e njëanshme të kontratës dhe referimin e rastit pranë organeve të drejtësisë”.

Në reagim Gjiknuri shprehet edhe me nota politike duke shkruar se “ky është dallimi i madh mes nesh dhe jush. Ne nuk i fshihemi asnjë përgjegjësie shteterore dhe as kemi gjë për të fshehur”.

Firma Dunëell Haberman vepron në Shqipëri përmes filialit të saj vendas “DH Albania”, e cila ka fituar një tender prej rreth 20 milionë dollarësh për një prej segmenteve të unazës së madhe në Tiranë.

Firma dyshohet se ka kryer dy falsifikime për të siguruar kontratën në Shqipëri. Ka falsifikuar datën e krijimit; në Dalaëeare kompania figuron e regjistruar para 6 muajsh, në 25 qershor 2018, ndërsa në Shqipëri ka depozituar dokumente, sikur ekziston që nga qershori i 1998. /k.k/noa.al/

NOA Sondazh