Deputetja demokrate Jorida Tabaku, thotë se shqiptarët e varfëruar për gjashtë vjet nga taksat e larta dhe jetesa e shtrenjtë, ata që enden qyteteve të papunë, ata që nuk mbyllin dot muajin dhe shumë të tjerë që jetojnë me sakrifica vazhdojnë të ndjejnë braktisjen e qeverisë, që mendon vetëm për një grusht klientësh.

Në një dalje për mediat nga selia blu, ajo tha, tanimë është faktuar nga të gjitha drejtimet se banda që sipas saj, qeveris sot vendin nuk mendon vetëm si të vjelë sa më shumë para nga xhepat e shqiptarëve, por edhe si të shpërdorojë sa më shumë para nga buxheti dhe arka e parave publike.

“Metoda e shpikur vetëm nën këtë qeverisje dhe bekuar me emrin gjoja perëndimor të PPP-ve u ka kushtuar deri më tani shqiptarëve 2.2 miliardë euro. Një shifër që është e barabartë me 31% të produktit të brendshëm bruto.Ndërsa 40% e qytetarëve të këtij vendi kanë marrë rrugën e pakthim të kurbetit dhe kërkesës për strehim politik, një grusht i vogël klientësh të qeverisë me kukullat e tyre në krye të ministrive kanë përgatitur një nga vjedhjet më të bujshme dhe më të frikshme të këtyre 2 dekadave pluralizëm.

Sipas të dhënave të vetë buxhetit të shtetit, projekti i hajdutërisë “1 miliardë euro” është vlerësuar me rritje në çdo PPP që qeveria ka programuar apo ia ka dhënë ndonjë prej oligarkëve”, u shpreh Tabaku.

Në cilësinë e nënkryetares së komisionit të Ekonomisë, ajo deklaroi se ky buxhet i cili parashikon rritjen e kostos për 1 kilometër rrugë nga 1 milionë euro në 11 milionë euro është dëshmia më e qartë e asaj vjedhje tanimë të ligjëruar me Ligjin e Buxhetit që kjo mazhorancë do të kryejë vitin e ardhshëm.

Sipas saj, buxheti në mënyrë të paprecedentë vendos në vitin 2019 koncesione me vlerë 105 milionë euro, duke ia hequr këtë investimeve normale në infrastrukturë, ujësjellës dhe shkolla.

Tabaku denoncoi se janë 2.1 miliardë dollarë për 14 kontrata PPP, klientelë e qeverisë.

“Gjoba vjetore 105 milionë euro në 2019, te gjitha para qe do të paguhen nga xhepat e shqiptareve. Borxhi publik rritet nga 72% ne 85% te Prodhimit të Brendshëm Bruto.

Çdo shqiptar, që nga fëmija i sapolindur tek më i moshuari do të paguajë këtë vit 730 euro”, tha ndër të tjera deputetja demokrate.

Ajo vijoi duke thënë se kushdo që voton buxhetin 2019 në fakt ka votuar një buxhet në interesin e oligarkëve dhe një pakice që dëshiron të skllavërojë shqiptarët njësoj siç dikur diktatura famëkeqe moniste bëri me prindërit tanë.

Tabaku e mbylli fjalën duke thënë se PD është e vendosur që të bëjë gjithçka ky buxhet skllavërues për shqiptarët të jetë buxheti i fundit i kësaj qeverie. /a.y/noa.al