Artan Broci është gjyqtari i radhës i Gjykatës së Lartë që largohet nga detyra si rezultat i vetingut.

Me shumicë votash, trupa gjykuese e Komisionit të Pavarur të Kualifikimit vendosi shkarkimin nga detyra të Artan Brocit, i cili mban dhe postin e Kryetarit të Këshillit të Emërimeve në Drejtësi.

Vendimi për të u mor ditën e sotme, ndërsa Broci nuk ishte i pranishëm në seancë.

Në veting kaloi edhe gjyqtari tjetër i Gjykatës së Lartë, Medi Bici, i cili u konfirmua në detyrë.

Artan Broci ka probleme me shtyllën e  pasurisë, pasi ka rezultuar me mospërputhje çmimesh për një apartament që ka blerë, dhe ka shmangur taksat.

Subjekti u mbrojt duke u shprehur se ka paguar detyrimet, por zyra e tatimeve nuk jep të dhënat.

Gjykatësi ka marrë notë pozitive për aftësitë profesionale dhe nuk ka kontakte me njerëz të krimit. /k.k/noa.al/