Reshjet e shiut të paralajmëruara që kanë përfshirë Shqipërinë dhe moti i keq duket se kanë shkaktuar edhe problemet e para duke sjellë edhe probleme në shumë zona.

Përveç bllokimit të disa rrugëve, moti i keq ka bërë që të pezullohet edhe mësimi në disa rrethe. Në Gjirokastër, Drejtoria Arsimore Rajonale ka pezulluar mësimin për ditën e nesërme më 1 dhjetor.

"Për shkak të kushteve të rënduara të motit mësimi i ditës së nesërme datë 1 dhjetor do të realizohet në një ditë të shtune. Lutem shpërndani njoftimin në mënyrë që të arrihet lajmërimi i të gjithë nxënësve", ka njoftuar DAR Gjirokastër.

Ndërkohë në Pukë për shkak të reshjeve është shembur çatia e spitalit dhe është dëmtuar çatia e shkollës.

Fatmirësisht nuk ka persona të lënduar, ndërsa autoritete vendore po punojnë për rregullimin e ambienteve.