Kryebashkiaku i Tiranës Erion Veliaj, inspektoi punimet për rikonstruksionin e Shkollës së Baletit

Veliaj tha se shkolla të tilla janë një vlerë e shtuar për nxënësit e rinj, sepse më pas, ata si artistë bëhen ambasadorët më të mirë të Shqipërisë në botë.

“Kjo shkollë, ashtu si Liceu Artistik, kanë prodhuar ‘ambasadorët’ më të mirë të Shqipërisë në botë, për imazhin e vendit. Besoj se është në nderin tonë që, teksa i afrohemi gjysmës së mandatit në Bashkinë e Tiranës, të paktën shkollat kombëtare t’i sjellim në kushte optimale studimi, ashtu siç bëmë edhe me Liceun”, tha kryebashkiaku.

Ai deklaroi se tashmë qytetarët e bëjnë kollaj dallimin mes atyre që janë të fokusuar te puna dhe atyre që humbasin kohë me fjalë.

“Unë besoj se njerëzit janë më entuziastë për të ndërtuar më shumë shkolla, se sa për të ngritur më shumë çadra; janë më optimistë për të ndërtuar më shumë rrugë, se sa për të bllokuar rrugë; janë më të gatshëm që të fokusohen te puna, se të fokusohen te gjumi”, tha ai.

Veliaj deklaroi se 18 qershori është momenti ideal për të marrë vlerësimin e qytetarëve për të gjitha premtimet e mbajtura dhe investimet e realizuara në të gjitha njësitë administrative të kryeqytetit.

“Ne në Tiranë kemi se çfarë të tregojmë në datën 18 qershor, kemi të gjithë të drejtën t’i shohim njerëzit në sy për premtimet e mbajtura, jo vetëm këtu në njësinë 2, por në të gjithë territorin e Tiranës. Është një moment ideal, që edhe ne të marrim një notë vlerësimi, nëse këto politika progresive të qeverisë dhe Bashkisë janë mënyra se si ecim përpara”, u shpreh Veliaj.

Deri më tani, në Shkollën e Baletit ka përfunduar puna për hidroizolimin e tarracës dhe mbulimin me panel, rikonstruksioni i fasadës me sistem kapotë, veshja me kompozit, suvatimet dhe vendosja e dritareve të reja.

Parketi i vjetër i sallës së baletit, i cili ishte dëmtuar rëndë si pasojë e reshjeve të shiut që futej brenda, është zëvendësuar me një parket të ri, ndërsa janë në proces instalimet elektrike, sistemi i ngrohjes dhe ftohjes.