Kryetari i opozitës Lulzim Basha ka sjellë një shembull domethënës për të ilustruar atë që mund të ndodhë nëse opozita pranon reformën në drejtësi pa zgjedhjet e lira dhe demokratike: Fatin e dy gjykatësve të famshëm italianë Paolo Borsellino dhe Giovanni Falcone që u vranë nga mafia.

“Ta zëmë për një moment me të vërtetë se reforma në drejtësi nuk ndodh ashtu si e ka projektuar Edi Rama për pushtetin e  tij dhe ne ia dalim të zgjedhim gjyqtarë e prokurorë të ndershëm. Po çfarë ndodh nëse nuk kemi zgjedhje të lira e të ndershme nëse nuk e shkëputim politikën nga krimi?! Këta do të vihen në shënjestrën e krimit dhe politikanëve të korruptuar dhe do të kenë fatin e Borselinos e Falkones që në luftë me mafian gjetën vdekjen”, u shpreh Basha.

Më tej Basha, përsëriti se opozita është e gatshme për dialog, për zgjidhjen që presin shqiptarët dhe jo monologje shterpë e fasadë. “Jemi gati prej 5 ditësh për dialogun për zgjidhjen që presin shqiptarët dhe jo monologje shterpë e fasadë dhe t’i rikthehemi lojës se kush e ka fajin”, tha Basha.

Kreu i PD-së shtoi: “Kemi thënë se ngrihemi bashkë për zgjedhje të lira e të ndershme, për një republikë të re që nuk do të jetë vetëm e demokratëve e socialistëve, por e të gjithëve. Pushteti duhet të burojë nga qytetarët me votë të lirë e të ndershme. Nuk është drejtësia e korruptuar që polli politikën e korruptuar, por politika e lidhur me krimin që polli drejtësinë e korruptuar dhe ka nevojë për të”.

Basha deklaroi se që çadra proteste të mos ngrihen më në vendin tonë, duhet që të përfundojë saga e zgjedhjeve të manipuluara nga krimi.

“Zgjedhjet e lira nuk mund të jenë produkt i një kompromisi të arritur për hir të kompromisit. Që kjo çadër të mos ngrihet më, saga e zgjedhjeve të manipuluara nga krimi e droga, duhet të marrë fund një herë e përgjithmonë. Zgjidhjet që ne kemi parashtruar: votim dhe numërim elektronik, kufizimi i shpenzimeve në fushatë elektorale, financimi 100% publik i partive janë masa të domosdoshme. Me zbatimin e ligjit të dekriminalizimit, do të japin garanci për zgjedhje të lira e të ndershme. Afërmendsh, autori i hashashizimit të republikës së vjetër, nuk mund të jetë edhe kryeministri”, theksoi Basha, i cili ftoi në fund qytetarët që sot, në orën 18:00, të mblidhen “në një ditë të veçantë të qëndresës 52-ditore, për të ndarë me shqiptarët lajmin e mirë se koha e zgjedhjeve fasadë, shoqërisë fasadë, arsimit fasadë ka përfunduar”. /b.l./noa.al/