Korçë, 5 dhjetor 2016, NOA.al- Zbulohen detaje të reja nga krimi që tronditi mbarë vendin mëngjesin e sotëm, ku një baba u mori jetën dy djemve të tij të mitur dhe më tej i dha fund edhe jetës.

41- vjeçari Naim Toshi kishte shkruar një letër dhe e kishte ngjitur në derën e shtëpisë dy katëshe ku jetonte me të vegjlit e tij, pak para krimit.

“Ngjituni lart” shkruhej në letrën që e gjeti babai i tij dhe gjyshi i dy vogëlushëve.

Ai hyri në shtëpi dhe në njërën nga dhomat e katit të dytë të banesës gjeti të varur djalin dhe dy nipërit të cilët janë 4 dhe 6 vjeç.

Motra e viktimës Lindita Golka, duke folur për mediat tregoi se i ati kishte shkuar në banesën e të birit për të ushqyer pulat mëngjesin e sotëm, ku letra i ka tërhequr vëmendjen dhe ka hyrë brenda, për t’u përballur me skenën drithëruese.

Gjithashtu bëhet e ditur se viktima prej afro dy muajsh jetonte i vetëm me dy fëmijët e tij, pasi e shoqja prej dy muajsh ishte larguar.

Nga të dhënat paraprake mësohet se gruaja kishte shkuar ditën e djeshme në shtëpi dhe më tej ishte larguar.

Gjithë këto të dhëna shtojnë dyshimet që krimi tronditës të jetë kryer në gjendje të rënduar psikologjike nga Naim Toshi, i cili nuk kishte shumë kohë që ishte kthyer nga emigracioni.

Ngjarja mendohet të ketë ndodhur gjatë natës mes të dielës dhe të hënës në lagjen nr.4 Korçë./a.y/noa.al