Tiranë, 11 tetor 2016, NOA.al- Kryebashkiaku Erion Veliaj, u ndal për të përuruar punimet në kopshtin 25 në Njësinë Administrative nr.4 në kryeqytet.

Veliaj, shfrytëzoi takimin me të vegjlit për të improvizuar një orë mësimi duke u shpjeguar atyre ndarjen e mbeturinave në kosha të caktuar.

Më tej, ai bëri të ditur se shumë shpejt nëpër kopshte do të fillojnë edhe orët që do synojnë të edukojnë fëmijët se si të sillen me ambientin dhe hapësirat e përbashkëta.

Një nismë kjo që do të nxisë fëmijët si t’i ndajnë mbetjet nëpër kosha të caktuar, duke i përzgjedhur mbetjet në të riciklueshme dhe të pa riciklueshme.

Kryebashkiaku tha se kjo do t’i shërbejë jo vetëm fëmijëve për t’u edukuar për të ardhmen e tyre, por edhe për të ndërgjegjësuar prindërit me kulturën e pastërtisë në qytet.

“Do të fillojmë shumë shpejt disa orë mësimi në kopshte, për mënyrën se si ndahen mbeturinat. Bashkia e Tiranës do të vendosë disa kosha në të gjithë qytetin: te koshat blu do hedhim të gjitha mbeturinat që nuk riciklohen, kurse te koshat jeshile do hedhim plastikën, letrën, metalin, të cilat mund të riciklohen. Duke pasur këto kosha ju do të na ndihmoni që t’u thoni prindërve që mos t’i hedhin plehrat përtokë, por ato që riciklohen tek koshat jeshil, kurse ato që nuk riciklohen tek koshat blu”, u tha fëmijëve Veliaj.

Kryetari i Bashkisë së Tiranës vlerësoi faktin se falë përkushtimit të administratës së re të bashkisë po shkon drejt fundit rikonstruksioni i të gjitha kopshteve në kryeqytet.

Ai shtoi se fokusi i punës në vitin e saj të parë të punës u përqendrua pikërisht te fëmijët, pasi duke ofruar kushte më të mira në çerdhe dhe kopshte rritet edhe mundësia që gjenerata e re të edukohet dhe zhvillohet më mirë.

Në kopshtin 25 janë kryer një sërë ndërhyrjesh që kanë bërë të mundur rinovimin e thuajse të gjitha ambienteve të brendshme dhe të jashtme të godinës. Ambientet e lojës dhe të fjetjes janë shtruar me parket druri, ndërsa janë vendosur dyer dhe dritare dhe dyer të reja druri dhe duralumini.

Një ndërhyrje e rëndësishme në këtë kopsht është bërë edhe në tarracë, për të shmangur lagështirën nga shirat dhe të nxehtin në verë. Gjithashtu, është ndërtuar një ambient i posaçëm për kaldajën i vendosur jashtë objektit, si dhe është vendosur një sistem qendror ngrohje. Janë vendosur gjithashtu sinjalizimet dhe sistemet e mbrojtjes kundër zjarrit. Sa i përket ambientit të jashtëm është bërë sistemimi dhe gjelbërim i territorit, si dhe kanalizimet e ujërave të zeza e të bardha.