Tiranë, 1 korrik 2016, NOA.al- Duke filluar që nga sot, asnjë farmaci nuk mund të jetë në një distancë më pak se 20 metra nga institucionet shëndetësore publike​.

Gjithashtu asnjë subjekt farmaceutik nuk do të mund të përfitojë kontratë me Fondin e Sigurimit të Detyrueshëm të Kujdesit Shëndetësor nëse është në hetim apo deri në përfundim të plotë të hetimeve.

Gjykata Administrative e Apelit Tiranë ka rrëzuar padinë e ngritur nga Urdhri i Farmacistit ndaj Fondit të Sigurimit të Detyrueshëm të Kujdesit Shëndetësor (FSDKSH).

Vendimi përfundimtar i trupës gjykuese është shpallur ditën e djeshmme pas përfundimit të procesit gjyqësor që nisi më 8 prill 2016, kur Urdhri i Farmacistit të Shqipërisë (UFSH) kërkoi rishikimin e vendimit të Këshillit Administrativ të FSDKSH-së nr. 71, datë 22.12.2015, “Për kriteret që duhet të plotësojnë farmacitë dhe agjencitë farmaceutike për lidhjen e kontratës me Fondin dhe procedurat për lidhjen e kontratës për vitin 2016” dhe shfuqizimin e disa pikave në përmbajtjen e tij.

Në padinë e tij, UFSH-ja kundërshtonte kriteret e parashikuara në pikat 10, 13, 14, 15, 19 dhe 20 të kreut I, të këtij vendimi, të cilat kishin të bënin, mes të tjerash, me distancën jo më pak se 20 metra që farmacitë duhet të kenë nga kufiri i jashtëm i institucionit shëndetësor publik; sipërfaqen e shfrytëzueshme prej 50 m2 që duhet të kenë farmacitë që lidhin kontratë për herë të parë me Fondin (ndërsa agjencia 15 m2); si dhe, kriterin që parashikonte zgjidhjen e kontratës së Fondit me farmacitë dhe agjencitë farmaceutike, të cilat janë në hetim nga organi i akuzës deri në përfundimin e plotë të hetimeve,

Të gjitha pretendimet e ngritura nga UFSH-ja në padinë ndaj Fondit u gjetën të pabazuara në ligj nga Gjykata Administrative e Apelit, e cila vendosi të rrëzojë kërkesë-padinë e ngritur.

Edhe pse më herët, me qëllim sqarimin e pretendimeve të ngritura nga UFSH-ja, Fondi realizoi një tryezë të përbashkët mes përfaqësuesve më të lartë të të dy institucioneve më 5 maj 2016, përfaqësuesit e UFSH-së vendosën që ta dërgonin çështjen në gjykatë.

Gjithashtu, të njëjtin qëndrim mbajti disa javë më parë edhe Autoriteti i Konkurrencës ndaj të njëjtave pretendime të ngritura nga UFSH-ja./a.y/noa.al