Tiranë, 23 maj 2016, NOA.al – Kreu i Departamentit të Rendit dhe Sigurisë, Enkelejd Alibeaj ka vijuar akuzat e tij ndaj kryeministrit Rama dhe ministrit të Brendshëm, Saimir Tahiri në lidhje me përgjimet e paligjshme. Sipas Alibeajt, kjo çështje vazhdon që të mbetet e mbuluar me mister dhe shefi i qeverisë nuk denjon që të kthejë përgjigje për pajisjen e përgjimit.

“Çfarë po ndodh me pajisjen e përgjimit? Ku gjendet ajo? Pse qeveria nuk paraqet dot një dokument ku tregohet se pajisja ka hyrë në territorin tonë në një datë të caktuar dhe është regjistruar? A vazhdon të përgjojë Tahiri për interesat e tij? Këto janë shqetësimet që ka sot opinioni publik në vend. Edhe pse PD e denoncoi këtë krim shtetëror, dhe kërkoi përgjigje e transparencë, ende qeveria, Rama, Tahiri nuk japin asnjë sqarim”, u shpreh Alibeaj.

Më tej ai shtoi se edhe në komisionin e Sigurisë Kombëtare, në seancën dëgjimore, Tahiri vetëm sa e thelloi skandalin, duke u përpjekur tua hedhë përgjegjësinë vartësve të tij dhe doganierëve.

“Sa më shumë ditë kalojnë aq më shumë thellohet kjo paligjshmëri, aq më shumë pasoja sjell ky krim shtetëror. Prokuroria është në një thirrje historike për të zbardhur sa më shpejt skandalin. Sytë e mbarë opinionit publik janë drejtuar nga hetimi që ajo po kryen. Kjo çështje duhet zbardhur e plotë dhe publiku, qytetarët duhet të mësojnë se kush e solli pajisjen, kush e përdori, për interesat e kujt u përdor, kush u përgjua dhe pse”, tha Alibeaj.

Në fund të deklaratës së tij Alibeaj u shpreh se, “Siguria kombëtare dhe të drejtat themelore të njeriut nuk janë dhe nuk mund të jenë peng i Saimir Tahirit. Nuk mund të ketë drejtësi për këtë çështje e hetim të plotë e të pandikuar me Tahirin në detyrë. Ndaj ai duhet të largohet që krimi të zbardhet, që e vërteta të dalë në shesh”./b.l/noa.al/

Komentoni mbi këtë lajm më poshtë. Nëse keni diçka për të raportuar mbi këtë temë, na shkruani tek [email protected]