“Top Music Awards”, eventi më i madh muzikor, zbulohen detajet
Transmetuar më 19-04-2016, 16:41

“Top Awards” prezantoi sot brand-in e ri me konferencën e parë për mediat, që u mbajt në Tiranë. Në një sallë të mbushur me partnerë mediatikë dhe ekonomikë, u zhvillua konferenca e parë nën logon e “Top Awards”.

Producentja Lori Hoxha, autori e moderatori Ledion Liço, së bashku me Ergys Lubonjën e Alban Malen, prezantuan për herë të parë logon zyrtare të eventit më të madh muzikor në Shqipëri.

Gjatë konferencës u zbuluan detaje ekskluzive nga mbrëmja muzikore e 24 Qershorit, mënyra e realizimit, teknologjia moderne dhe çdo element spektakolar me parametrat perëndimorë.

Producentja Lori Hoxha dhe autorët deklaruan për gazetarët e pranishëm se kjo ngjarje e madhe muzikore do të sjellë në skenën e Pallatit të Kongreseve 12 çmime për muzikën moderne shqiptare, dhe performancat që do të mbahen në skenë do të jenë të një niveli të ngjashëm me ato të “MTV Music Awards”, “Grammy’s”, “VMAs”, etj.

Pyetjeve në lidhje me mënyrën e moderimit të një eventi kaq gjigant, Ledioni iu përgjigj se këtë vit do të dalë më pak se çdo herë në skenë, pasi sipas tij; “skena shqiptare ka plot artistë që na përfaqësojnë denjësisht, dhe që do ta kenë shumë të thjeshtë edhe prezantimin e çmimeve”.

Nominimi i artistëve për “Top Music Awards”

“Top Music Awards” është eventi muzikor, që organizohet për herë të parë në Shqipëri me kulmimin e natës së spektaklit të madh që do të mbahet më 24 Qershor 2016 në skenën e Pallatit të Kongreseve.

“Top Music Awards” është një markë e re në tregun shqiptar dhe një patentë e re televizive nën pronësinë e “Top Media”. Në prezantimin e saj, producentja Znjsh.Lori Hoxha theksoi se; “Top Awards” do të jetë e para ceremoni ekskluzive për ndarjen e çmimeve të muzikës moderne shqiptare.

Në 24 qershor, Pallati i Kongreseve do të jetë arena që do të mirëpresë artistët më të mirë shqiptarë dhe të ftuar ndërkombëtarë”. Ndërsa autori dhe moderatori i eventit, Ledion Liço prezantoi në detaje formatin dhe strukturën e “Top Music Awards” duke u përqendruar tek suksesi absolut i këtij eventi.

Ky format vlerëson muzikën që publikohet në 10 muaj kalendarikë, në YouTube, Radio dhe Televizion. “TMA” ka në përbërje Bordin Artistik të Kanaleve Muzikore “Top Media” (TCH, MM, MMR, TAR) si edhe Bordin e TMA, të cilët përgatisin listën e shkurtër të artistëve të nominuar në kategoritë e 12 çmimeve, duke i shtuar edhe votat të publikut çdo javë.

Performancat dhe parakalimet e artistëve dhe personazheve të show bizz-it në “Tapetin e Kuq” do të transmetohen Live para spektaklit në ekranin e “Top Channel”.

Më poshtë janë të listuara çmimet e “Top Music Awards 2016”

1.Female Artist of the Year

2.Male Artist of the Year

3.Best Band

4.Best Live Act

5.Video of the Year

6.Innovative

7.Song of the Year

8.TAR Hit

9.My Music Hit

10.Album of the Year

11.Honorary Award

12.Artist to Watch