Nga Kushtrim Gashi

Derisa një pjesë e luftëtareve të UCK-së u mashtruan pas pasurisë, armiqtë e tyre që ishin serbë, por edhe një pjesë e shqiptarëve, nuk u ndalën duke punuar kundër tyre, duke bërë edhe dosje për atë që bënë gjatë luftës.

Gjykata Speciale është rezultat i punës se tyre, andaj luftëtarët e lirisë do të akuzohen për vrasjet që nuk kanë ndodhur fare dhe pikërisht ata do të paguajnë ketë faturë që do të jetë shumë e shtrenjtë.

Në opinion po flitet dhe diskutohet për një listë emrash që janë edhe drejtues të institucioneve të vendit, por a do të akuzohen vërtetë apo jo, mbetet të shihet!

Në rast se ndodh që udhëheqësit e institucioneve të vendit të akuzohen nga Specialja, atëherë do të tronditet e gjithë skena politike në vend dhe rrjedhimisht do të fuqizohen partitë politike që nuk ishin pjesë e luftës, përkatësisht LDK-ja dhe VV-ja.

E keqja e madhe e gjithë kësaj, do të jetë kur drejtuesit politikë të UÇK-së dhe komandantët e saj të akuzohen nga Specialja. Dhe ndërsa ata do të jenë përballë sfidës më të rëndë, rivalët e tyre politikë do të bëjnë festë në kurriz të fatkeqësisë se tyre.

Megjithatë, ish kryeministri i Kosovës Hashim Thaçi dhe kryetari i Kuvendit të Kosovës Kadri Veseli me përpjekjet e tyre për aprovimin e amendamenteve kushtetuese për Gjykatën Speciale, për dallim nga liderët e tjerë, dëshmuan pjekurinë e tyre politike dhe kombëtare, duke vendosur interesin e shtetit para atij personal.

***

Nëse dikush vërtet mendon që skena politike do të pastrohet me ngritjen e aktakuzave ndaj ish krerëve të UÇK-së, atëherë do të gabohej plotësisht sepse ata po gjykohen për luftën që na solli lirinë e jo për pasluftën.

Duke pasur parasysh që kriminaliteti ekonomik është shumë i ndërlidhur me ekonominë, biznesin, jetën politike dhe është vështirë të zbulohet dhe evidentohet, realisht në vendin tonë është shumë i përhapur, atëherë pashmangshëm Gjykata Speciale do të duhej të merret edhe me ketë kancer të shoqërisë sonë.

Lufta e vërtetë e Gjykatës Speciale do të duhej të jetë ndaj korrupsionit, krimit të organizuar dhe kriminalitetit të jakës së bardhë që kanë përfshirë çdo segment të jetës në Kosovë.

Vetëm në këtë mënyrë duke ngritur akuza për kriminalitetin ekonomik, në njërën anë do të pastrohet Kosova nga njerëzit e krimit, ndërsa në anën tjetër qytetarët do marrin frymë lirshëm dhe vendi ynë do të kishte shanset me të mëdha për punësim dhe zhvillim ekonomik.

Kosova nga një vend jo atraktiv për investime do të bëhej një vend atraktiv, ku investitorët potencialë do të mund të investonin kapitalin e tyre.

Të bëhemi lider në Evropën Juglindore për tërheqjen e investimeve të huaja sepse këtë primat tani për tani e mban Mali i Zi, ku sipas të dhënave të Entit Malazez për Statistika, niveli i investimeve të huaja ka arritur mbi 500 milionë euro.

Dhe vetëm në ketë formë Kosova do të shndërrohet nga një vend i lirë për të fortët dhe i pabarabartë e diskriminues për të gjithë ata që respektojnë ligjin dhe rregullat, në një vend të lirë për të gjithë qytetarët që respektojnë ligjin e rregullat dhe sanksionues e dënues për të fortët.