Grupi tashmë i njohur muzikor “One Direction” ka kërkuar që të marrë një kat të tërë në vijë të drejtë te një hotel, duke detyruar drejtuesit e godinës që të marrin masa për të zbrazur dhomat e atij kati që dëshironin.

Por në atë kat, prej afro dy muajsh, qëndronte aktorja e njohur me origjinë shqiptare Eliza Dushku.

Asaj i është dashur të largohet nga dhoma e hotelit pasi grupi “One Direction” këmbënguli se e donte të gjithë katin e hotelit për vete edhe pse e dinte se aty gjendej aktorja e njohur kryesisht për filma thriller dhe horror.

Aktorja ka reaguar duke bërë një postim në llogarinë e saj të Instagram-it, ku te foto (e dyta që shihni më poshtë) shihet të ketë paketuar valixhen e saj për t’u zhvendosur në një dhomë tjetër.

Eliza ka përdorur ironi të hollë, ndaj grupit “One Direction”: “Mos u shqetësoni “1D”, ishte shumë qejf të lëvizja nga dhoma ku kam qëndruar për dy muaj, në mënyrë që ju të merrni të gjithë katin”, shkruan Eliza bashkangjitur fotografisë së publikuar.