Tiranë, 3 qershor 2015, NOA.al- Këshilli Kombëtar të Restaurimeve miraton kërkesën për rikonstruksionin e objektit ish-Hotel Dajti, duke u cilësuar si Monument Kulture i Kategorisë  II.

Në mbledhjen e radhës së Këshillit Kombëtar të Restaurimeve, që u zhvillua në ambientet e Ministrisë së Kulturës dy ditë më parë, u shqyrtua projekti “Rikonstruksioni dhe ndërtimi i objektit ish-Hotel Dajti Tiranë-Projekti i Zbatimit”, me porositës Bankën e Shqipërisë.

Këshilli Kombëtar i Restaurimit pezulloi kështu punimet në fasadën e ish-hotel “Dajtit”, i blerë pesë vjet më parë nga Banka e Shqipërisë.

Arsyeja është dalja nga projekti fillestar, i realizuar në fund të viteve ‘30 nga arkitekti italian, Gherardo Bosio.

Godina rezulton objekt i kategorisë së dytë, ndaj fjalën e fundit e ka Këshilli Kombëtar i Territorit.

Pas disa orësh diskutimi, të alternativave dhe të hapësirave ligjore, KKR thellësisht e shqetësuar për gjendjen e degraduar të godinës së ish-Hotel Dajtit, me synimin për të shpëtuar objektin nga degradimi i mëtejshëm, mbështetur në kompetencat dhe detyrimet ligjore të saj, vendosi:

– Të miratojë restaurimin e objektit “Ish-Hotel Dajti”, si Monument Kulture i Kategorisë  II, duke ruajtur të pandryshuar pamjet e tij të jashtme dhe duke respektuar rifiniturat, volumetrinë ekzistuese dhe të gjitha dëshmitë historike të tij.

– Të mos miratojë të gjitha shtesat  e tjera të propozuara nga projekti brenda perimetrit të territorit të objektit./a.y/noa.al

Komentoni mbi këtë lajm më poshtë. Nëse keni diçka për të raportuar mbi këtë temë, na shkruani tek [email protected]