Tiranë, 27 nëntor 2014, NOA.al- Kryetari i Bashkisë së Tiranës dhe kryetari i PD Lulzim Basha priti në një takim një delegacion të Federatës Pan-Shqiptare "Vatra", të kryesuar nga kryetari, Gjon Bucaj.

Gjatë takimit Basha shprehu mirënjohjen e tij dhe të PD për kontributin e jashtëzakonshëm që “Vatra” ka dhënë për Shqipërinë dhe çështjen shqiptare gjatë 102 viteve të ekzistencës së saj.

“Ndihma dhe kontributi i diasporës shqiptare në SHBA dhe i federatës Pan-Shqiptare “Vatra” është i pazëvendësueshëm në mbështetjen që i kanë dhënë Shqipërisë në rrëzimin e regjimit komunist dhe në konsolidimin e demokracisë”, u shpreh Basha.

Nga ana e tij Bucaj shprehu falënderimet për bashkëpunimin e që ka pasur gjatë këtyre viteve mes PD dhe kësaj organizate.

Si një ndër organizatat shqiptare në SHBA që u investua fuqimisht kundër regjimit komunist në Shqipëri, “Vatra” shprehu gjatë takimit shqetësimin për përpjekjet për rehabilitimin e figurës së diktatorit Hoxha.

Kryetari i “Vatrës”, Bucaj dënoi ashpër shfaqjen e fotografisë së diktatorit Hoxha, duke e konsideruar këtë si përdhosje të gjakut të mijëra viktimave të regjimit komunist.

Nga ana e tij Basha ka mirëpritur propozimin e “Vatrës” për të emërtuar disa rrugë në kryeqytet me emrat e personaliteteve të shquara  të kësaj organizate të cilët kanë dhënë kontribut të rëndësishëm për çështjen kombëtare./a.y/noa.al/

Komentoni mbi këtë lajm më poshtë. Nëse keni diçka për të raportuar mbi këtë temë, na shkruani tek [email protected]