Tiranë, 23 shtator 2014, NOA.al- Ministri i Brendshëm Saimir Tahiri, në një konferencë lidhur me luftën kundër lëndëve narkotike nga periudha mars-shtator 2014, e cilësoi si një aksion të kurorëzuar me sukses.

Ai tha se qeveria e kaluar nuk kishte lëvizur asnjë gisht për të asgjësuar lëndën narkotike. Tahiri deklaroi se parcela e parë e mbjellë me kanabis u asgjësua në mars 2014 në Berat dhe nga aty filloi gradualisht aksioni më i madh antidrogë i realizuar ndonjëherë në Lazart.

Këtë aksion ai e cilësoi si një simbol të sfidës së hapur për të mos bërë asnjë hap pas në luftën kundër kultivimit të lëndëve narkotike, ndërsa si një tjetër operacion të kurorëzuar me sukses cilësoi atë në Dukagjin, ku për shkak të terrenit të vështirë tha se u bë edhe më e komplikuar situata.

“Nga marsi deri në sot janë asgjësuar 2214 parcela me lëndë narkotike në gjithë Shqipërinë, ashtu sikundër janë asgjësuar 530 mijë rrënjë kanabis. Këto shifra janë më shumë se sa rrënjët e shkatërruara në gjashtë vitet e fundit. Janë sekuestruar 107 tonë marijuanë. Janë proceduar penalisht mbi 1000 persona, janë shkatërruar 41 grupe kriminale. Tashmë mund të them me krenari se Shqipëria nuk është më vend kultivimi dhe trafikimi për lëndët narkotike”, u shpreh Tahiri.

Ai ngriti pikëpyetje se ku kanë shkuar paratë e lëndëve narkotike deri dje. Në vijim shtoi se me ato para është furnizuar bota e krimit, është korruptuar drejrësia dhe demokracia.

Në mbyllje ministri Tahiri tha se qeveria shqiptare nuk mjaftohet me kaq dhe nuk do të ndalet, ndërsa shtoi se ka ende shumë punë për të bërë.

SASIA E DROGËS TË ASGJESUAR (Janar – Shtator 2014)

2214                Parcela të shkatërruara

798                  Parcela të identifikuara nga Interforca

530 177           Bimë të asgjesuara

101.7 TON      Marijuanë e kapur

62 KG             Heroinë

23 KG             Kokainë

Vlera monetare e drogës së kapur në treg = 6.4 mld euro

PROCEDIME PENALE

1918                Procedime penale

1058                Persona të arrestuar

604                  Persona ndiqen në gjendje të lirë

187                  Persona në kërkim

41                    Grupe kriminale

9                      Kryetarë Komunash e Kryepleq

SHIFRA KRAHASUESE

2008 – 2013    =  503 626 Bimë të asgjesuara

2014                =  530 177 Bimë të asgjesuara

2005 – 2013  = 96  Ton Marijuanë e kapur

2014                =  101.7  Ton Marijunë e kapur  /a.y/noa.al/

Komentoni mbi këtë lajm më poshtë. Nëse keni diçka për të raportuar mbi këtë temë, na shkruani tek [email protected]