Luiz Suarez mezi pret të luajë në ndeshjet zyrtare me Barcelonën dhe për këtë qëllim po stërvitet fort, që të jetë gati fizikisht dhe psikologjikisht, citon Supersport.

Ai e di mirë se nuk mund të përsërisë atë gabim për të cilin u pezullua për 4 muaj. Për aq kohë se do të jetë në fushë, sytë do të jenë drejtuar pikërisht tek ai.

“Jam shumë i qetë, pasi një situatë të tillë e kam përjetuar edhe kur luaja në Angli me Livepool-in. Jam mësuar me këtë lloj presioni”. Gjithsesi uruguaiani e ka të qartë që do të jetë gjithmonë në fokusin e medias.

“Duhet të mësohem edhe me këtë fakt. Jam pjesë e klubit më të mirë në botë dhe është normale që do të ketë më shumë sy që të shikojnë”.

27-vjeçari i ka ndjekur në shtëpi dy fitoret e Barcelonës në këtë fillim sezoni. Suarez u gezohet sukseseve me Elchen dhe Villarrealin, por nuk e fsheh faktin që vuan shumë, pa patur mundësi të japë kontribut në fushën e blertë.

“E vërteta është se vuajta shumë. E ndjen veten të pafuqishëm, vetëm mund të bërtasësh dhe të flasësh më zë të lartë. Vetëm kjo të lejohet. Je i detyruar ta pranosh realitetin”.

Megjithatë Suarez është shumë i gëzuar që mund të stërvitet me skuadrën. “Mund t’u them fëmijëve të mi se po shkoj të stërvitem, dhe kjo më qetëson shumë dhe më bën të ndihem futbollist.”