Tiranë, 4 korrik 2014, NOA.al- Presidenti i Komisionit Evropian, José Manuel Barroso, nëpërmjet një letre drejtuar Presidentit Bujar Nishani shprehet se forcat politike duhet të intensifikojnë përpjekjet për reforma dhe se vetë Presidenti Nishani duhet të punojë për konsensus të gjerë kombëtar.

Barroso ka falënderuar për bisedimet konstruktive që u realizuan në Tiranë më 30 qershor, duke shtuar se ishte shumë i kënaqur të zhvillonte vizitën gjatë momentit historik kur Shqipëria mori statusin kandidat dhe ndihet mirënjohës dhe i nderuar për dekorimin me Titullin e “Flamurit Kombëtar” nga Presidenti Nishani, të cilin e quan një shenjë të angazhimit të përbashkët për perspektivën europiane të kombit tonë. /a.s/noa.al

Letra e plotë e Presidentit të Komisionit Evropian, José Manuel Barroso

“I dashur President,

Gjej rastin t’Ju falenderoj edhe njëherë për bisedimet konstruktive që patëm në Tiranë më 30 qershor. Isha shumë i kënaqur të zhvilloja vizitën gjatë momentit historik kur Shqipëria mori statusin kandidat, dhe ndihem mirënjohës dhe i nderuar për dekorimin me Titullin e “Flamurit Kombëtar” nga Ju, të cilin e quaj një shenjë të angazhimit të përbashkët për perspektivën europiane të kombit tuaj.

Ne kemi hapur tashmë një kapitull të ri në marrëdhëniet BE-Shqipëri. Jam i bindur se të gjitha forcat politike në Shqipëri, do të ndërtojnë mbi këtë sukses të përbashkët dhe do të intensifikojnë dhe përshpejtojnë përpjekjet e tyre për reforma, kryesisht në drejtim të prioriteteve kyçe të identifikuara për hapjen e negociatave, me fokus të veçantë tek shteti i së drejtës.

Siç diskutuam, është shumë e rëndësishme që reformat të ndërmerren në një mënyrë të qëndrueshme dhe përfshirëse. Më lejoni, për këtë arsye, t’Ju inkurajoj si zyrtarin dhe liderin më të lartë të shtetit të vazhdoni të punoni për këtë konsensus të gjerë kombëtar!

Jam i bindur se Shqipëria do të shënojë progres të mëtejshëm të rëndësishëm në rrugën e saj drejt Bashkimin Evropian në vitet në vazhdim, dhe pres më kënaqësi takimin tonë të ardhshëm.”